Tveir fullfermistúrar og enskt dufl

„Það hefur verið góður gangur í veiðunum alla síðustu viku og við kvörtum ekki,” segir Einar Pétur Eiríksson, skipstjóri á Sóleyju Sigurjóns GK, togskipi Nesfisks í Garði sem er nú á fisktrolli úti fyrir Austurlandi. Auk 120 tonna afla sem að uppistöðu var þorskur komu þeir til Siglufjarðar með eitt stykki enskt tundurdufl.

Heimahöfn varðskipsins Freyju er Siglufjörður og liðsmenn sprengjusveitar Gæslunnar fóru til móts við Sóleyju Sigurjóns þegar hún kom inn í fjörðinn og tóku við duflinu til eyðingar.

„Við fengum duflið í pokann á Litla-Grunni. Þetta er ekki stórt stykki, kannski eins og hálf olíutunna. Manni stendur ekkert á sama en við skorðuðum þetta vel af og héldum duflinu blautu. Gæslumenn komu svo á móti okkur á léttabát þegar við komum inn fjörðinn, komu um borð og fluttu duflið á réttan hátt úr skipinu,“ segir Einar.

Þegar allt er annars með eðlilegum hætti landar Sóley Sigurjóns fiski á Siglufirði og svo er siglt strax aftur að löndun lokinni austur til veiða. Skipið er gert út á rækjuveiðar á sumrin og landar þá líka á Siglufirði. Þaðan er rækjunni ekið til Hvammstanga þar sem Nesfiskur rekur rækjuvinnsluna Meleyri. Frá því á síðasta sjómanndag og út september veiddu þeir 360 tonn af rækju sem er umtalsvert minna en í fyrra enda enda var skipið mikið frá veiðum vegna slipptöku þegar skipt var um kælikerfi.

„Þegar við erum á fiskitrollinu löndum við reyndar yfirleitt þar sem styst er að fara. Bolfisknum er öllum trukkað suður þar sem hann fer í vinnslu hjá Nesfiski,” segir Einar.

Mokfiskað

Sóley Sigurjóns landaði á þriðjudag á Siglufirði 120 tonnum og var aflinn nánast hreinn þorskur. Skipið var rétt rúma tvo sólarhringa á veiðum svo segja má að menn hafi mokfiskað.

„Við höfum fengið tvo hörkutúra núna hérna á Litla-Grunni en það er eitthvað rólegra í augnablikinu og við erum að reyna að staðsetja fiskinn. Þorskurinn er hérna fyrir utan kjamsandi í síldinni og leggst síðan á botninn hérna, stútfullur af æti og líður vel þar til hann kemur í pokann hjá okkur. Meðalþyngdin er um fjögur kíló.”

Fyrsta löndun á fiskitrolli var 5. október. Aflinn er farinn að nálgast 500 tonn þótt fyrstu túrarnir hafi verið hálf lélegir. Tvo túra í röð núna hefur skipið komið með fullfermi.