Marianne Rasmussen-Coulling, framkvæmdastjóri sýningarinnar, bauð gesti velkomna og sagði meðal annars:
„Allir þeir fjölmörgu sýnendur og gestir sem hér eru koma ekki aðeins vegnar hinnar miklu gestrisni Íslendinga, heldur einnig vegna þess að Ísland er sem fyrr í fararbroddi í þróun tækni fyrir sjávarútveg og vinnslu. Íslendingar horfa til framtíðar til að tryggja til langs tíma sjálfbærni þessa stórkostlegu atvinnugreinar sem þið hlúið að betur en flestir aðrir.“
Benedikt Árnason, ráðuneytisstjóri matvælaráðuneytisins, setti síðan sýninguna formlega. Hann benti á að loftlagsbreytingar búi til áskoranir í sjávarútvegi sem bæði atvinnugreinin og stjórnvöld verði að taka höndum saman um til að tryggja að Ísland nái markmiðum sínum á sviði loftlagsmála.
„Íslenska sjávarútvegssýningin skapar mikilvægt tækifæri til að kynna og fylgjast með nýjustu þróun varðandi orkunýtingu í sjávarútvegi, og hvernig skipahönnuðir og skipasmiðir, sem og framleiðendur búnaðar fyrir veiðiskip, eru að bregðast við nýjum áskorunum. Það eru margar áskoranir í þessum geira og stjórnvöld verða líka að tryggja að hagsmuna íslensk sjávarútvegs sé gætt á alþjóðavísu.”
Um 400 fyrirtæki sýna á Icefish 2022, þar á meðal eru glæsilegir sýningarskálar frá Noregi, Færeyjum, Danmörku og Spáni. Sýningin stendur yfir í dag, 8. júní, fimmtudaginn 9. júní og föstudaginn 10. júní.
