Aldrei hefur eins mikið efni verið sent til endurvinnslu frá Hampiðjunni Ísland og árið 2024 eða um 1.294 tonn og hefur magnið aukist ár frá ári, frá um 500 tonnum árið 2021. Frá þessu segir á heimasíðu Hampiðjunnar.
Hampiðjan hefur lengi tekið á móti notuðum veiðarfærum frá viðskiptavinum sínum, flokkað hann og sent til endurvinnslu, aðallega til Danmerkur og Litháen. Þar eru efnin möluð, þvegin og brædd til að búa til plastkorn sem nýtt eru í framleiðslu nýrra vara. Helstu samstarfsaðilar Hampiðjunnar eru Plastix í Danmörku og Polivektris í Litháen, auk norska fyrirtækisins Nofir, sem sérhæfir sig í endurvinnslu veiðarfæra.
Að auki fellur töluvert til af efni á netaverkstæðunum við framleiðslu og viðgerðir veiðarfæra sem er flokkaðog hreint pólýetýlen (PE) efni, aðallega trollnet, er sent til Hampidjan Baltic í Litháen. Þar er það malað, brætt og breytt í ný plastkorn sem blönduð eru við nýtt efni í allt að 10% hlutfalli.
Stærsti hluti endurvinnsluefnisins nylon eða um 379 tonn, um 250 tonn af rockhopper gúmmíi og polyethylen sem var ríflega 146 tonn. Töluvert af málmum er sent í endurvinnslu eða 159 tonn og 103 tonn af flottrollsköðlum. Minna var sent sent til endurvinnslu af öðrum efnum. Hlutur óendurvinnanlegs efnis reyndist 170 tonn á síðasta ári eða einungis um 13% af innsöfnuðu efni.
Ábyrgð í hringrásarhagkerfi
„Hampiðjan vinnur stöðugt að því að leita lausna fyrir óendurvinnanleg efni, svo sem kaðla úr blönduðum efnum, sem í dag nýtist einungis til orkuendurvinnslu. Við leggjum mikla áherslu á sjálfbærni í starfsemi okkar með endurvinnslu og endurnýtingu efna,“ segir Georg Haney, umhverfisstjóri Hampiðjunnar.
