Stjórnstöð Landhelgisgæslunnar boðaði áhöfn björgunarskips Slysavarnafélagsins Landsbjargar, Odds V. Gíslasonar í Grindavík, út í morgun klukkan tuttugu mínutur yfir tíu.
Lítill fiskibátur var þá í vandræðum um þrjár sjómílur suður af Hópsnesi, naut ekki vélarafls og óskaði aðstoðar við að draga bátinn til lands.
Oddur V. Gíslason með fimm manns í áhöfn, var kominn á staðinn og taug kominn á milli björgunarskips og báts á tólfta tímanum og er björgunarskipið nú á heimleið með fiskibátinn í togi. Verður hann dreginn til hafnar í Grindavík og áætlar komu þangað um eitt leitið. Oddur V Gíslason er eitt af eldri skipum björgunarskipaflota Slysavarnafélagsins og vegna þeirrar óvissu sem er uppi um starfsemi og byggð í Grindavík, er það síðast í endurnýjunar röð björgunarskipa Slysavarnafélagsins Landsbjargar. Fimmta skipið í því verkefni er komið á flot í Finnlandi og verður afhent Hornfirðingum í næsta mánuði.
