Landvinnsla Samherja á Dalvík er ein tæknilegasta og afkastamesta hvítfisksfiskvinnsla í heimi. Hún er búin allra nýjustu tækni og þar fara í gegn allt að 130 tonn af þorski á einum degi. Sá sem heldur utan um hlutina í vinnslunni er Sigurður Jörgen Óskarsson yfirverkstjóri landvinnslu Samherja á Dalvík.
Sigurður Jörgen man tímana tvenna í fiskvinnslunni. Hann er fæddur á Fáskrúðsfirði og ólst þar upp við sjóinn og hefur alla tíð verið nátengdur veiðum og vinnslu. Einungis tíu ára gamall keypti hann sér lítinn bát og lagði kolanet í firðinum sínum fyrir austan. Hann lét verka aflann og fór svo með systkinum sínum um þorpið og þau seldu þeim sem vildu kaupa kola. 17 ára fór hann á Hoffell SU 80 þar sem þeir bræður Högni og Atli Skaftasynir voru skipstjóri og stýrimaður. Svo tóku ferðalögin við og Sigurður drap niður fæti víðs vegar um heiminn á sex ára tímabili. Að því loknu náði hann sér í einingar í Menntaskólanum á Egilsstöðum til þess að geta sótt um nám í Fiskvinnsluskólann í Hafnarfirði.
Sigurður Jörgen var í viðtali við Fiskifréttir í tímariti blaðsins sem kom út 18. september síðastliðinn. Þar fer hann yfir ferilinn og starfsemina á Dalvík.
