Eins og fram hefur komið í fyrri hlutum jólablaðsviðtals Fiskifrétta við Grétar Rögnvarsson, skipstjóra á Jóni Kjartanssyni SU 111, er hann nú kominn endanlega í land eftir fimmtíu ár á sjó og er ánægður með ferilinn.

„Ég hef verið heppinn með sömu áhöfn og hafa margir verið með mér lengi og eru miklir vinir mínir,“ undirstrikar Grétar um samferðamenn sína á sjónum.

Flytja suður og vera nær Spáni

„Nú er bara að fara að njóta lífsins og leika sér. Við eigum hús úti á Spáni og ætlum að reyna að vera mikið þar. Svo erum við á skíðum og við erum með mótorhjól og hjólhýsi,“ nefnir Grétar sem dæmi um það sem hann muni nú taka sér fyrir hendur á ásamt síðari konu sinni, Ingu Rún Beck félagsráðgjafa. Þau búa á Reyðarfirði.

„Inga er talsvert yngri en ég. Hún er búin að vera að vinna hjá Fjarðabyggð í nokkur ár í félagsþjónustu en við erum að spá í að fara að hreyfa okkur eitthvað kannski, flytja suður. Ég held að það endi þannig. Þá er styttra til Spánar,“ segir Grétar og hlær.

Synir á sjónum og dóttir fyrir sunnan

Grétar á þrjú börn með fyrrverandi konu sinni. Þeim fæddist stúlka sumarið 1978. „Þegar hún fæddist var ég úti á sjó á Hólmanesi. Hún kom svo bara með okkur um veturinn á meðan ég var að klára Stýrimannaskólann. Síðan komu tveir strákar 1981 og 1992,“ segir hann.

Dóttir Grétars býr í Reykjavík og starfar ekki í sjávarútvegi en synirnir tveir eru báðir sjómenn. „Annar er á Jóni Kjartanssyni þar sem ég hef verið og hinn var lengi á Ljósafelli frá Fáskrúðsfirði en er núna skipstjóri á laxabáti þar og er að vinna í laxeldinu og er langt kominn með Stýrimannaskólann,“ segir hann.

Fullt af barnabörnum

Gréta lék fótbolta með Austra og er harður stuðningsmaður Arsenal og mætir á leiki liðsins eins og hér með föður sínum og syni. Uppi til vinstri fagnar hann sigri Íslands á Englendingum á EM 2016. Grétar kveðst vera með dálitla bíladellu og á Lincoln fornbíl. Meðal annarra áhugamála hans eru skotveiðar og fer hann bæði á hreindýr og rjúpu. Mynd/Samsett
Gréta lék fótbolta með Austra og er harður stuðningsmaður Arsenal og mætir á leiki liðsins eins og hér með föður sínum og syni. Uppi til vinstri fagnar hann sigri Íslands á Englendingum á EM 2016. Grétar kveðst vera með dálitla bíladellu og á Lincoln fornbíl. Meðal annarra áhugamála hans eru skotveiðar og fer hann bæði á hreindýr og rjúpu. Mynd/Samsett

Fjölskyldan er Grétari hugleikinn. Hann segir þau Ingu ekki eiga börn saman en vera í fullu fjöri og eiga fullt af börnum.

„Ég á föður á lífi og hún á sína foreldra á lífi og við eigum fullt af barnabörnum sem við höfum mjög gaman af. Það er nóg að gera ef maður vill.“

Hús þeirra á Spáni er á Torrevieja svæðinu suður af Alicante og Grétar segir þau vilja vera með annan fótinn þar. „Þar er mjög mikið af Íslendingum. Okkur líður ægilega vel þarna. Erum mikið að hjóla á reiðhjólum og byrjuðum flesta daga á því þegar við vorum úti núna síðast. Svo erum við að spá í að prófa golf. Eitthvað verður maður að gera.“