„Þar sem bláskelin umbreytir næringarefnum eins og fosfór og köfnunarefni í prótein getur hún komið sterk inn á markaðinn sem fóðurhráefni bæði fyrir menn og dýr,“ segir Guðni Þ. Ölversson, fyrrverandi kennari, í grein í Bændablaðinu.
Í grein sinni segir Guðni að ein allra stærsta áskorun samtímans sé hvernig hægt verði að mæta vaxandi þörf fyrir matvælaframleiðslu. Samhliða verði að finna leiðir til að koma í veg fyrir eyðileggingu vistkerfa. Aðaláherslan verði á niðurskurð í losun á gróðurhúsalofttegundum.
Öflugur liðsmaður í hreinsun sjávar
„Þar kemur bláskelin til sögunnar sem öflugt vopn í baráttunni fyrir frískari og „grænni“ ræktun en áður hefur þekkst,“ segir í grein Guðna. „Þar sem bláskelin umbreytir næringarefnum eins og fosfór og köfnunarefni í prótein getur hún komið sterk inn á markaðinn sem fóðurhráefni bæði fyrir menn og dýr. Auk þess er hún góður liðsmaður þeirra sem berjast fyrir að draga úr mengun sjávarins.“
Í greininni er bent á að framleiðsla á eldislaxi sé langstærsti hluti þess sem ræktaður er í kvíum inni á fjörðum og flóum í okkar heimshluta.
Mikill munur á fiskeldi og sjálfala bláskeljaeldi
„Margir líta sömu augum á bláskeljaeldi og fiskeldi. En þar er mikill munur á. Bláskelin veiðir sína eigin fæðu og hreinsar sjóinn en kvíalaxinn er að mestu fóðraður á verksmiðjuframleiddu fóðri frá bændum,“ segir Guðni sem telur að bláskelin geti orðið ómissandi þáttur í grænni fóðurframleiðslu fyrir bæði menn og skepnur.
Nánar má lesa um málið í grein Guðna á bbl.is. Þar segir til dæmis frá því að búfé finnist bláskelin bæði bragðgóð og auðmeltanleg.
