Bergur VE og Gullver NS með fullfermi

Tveir togarar Síldarvinnslusamstæðunnar lönduðu á Seyðisfirði í gærkvöldi og í morgun. Í gærkvöldi kom Bergur VE með fullfermi. Jón Valgeirsson skipstjóri segir að aflinn hafi mest verið ýsa, en veitt var á Gerpisflaki og á Gula teppinu. „Segja má að túrinn hafi gengið vel í alla staði,” segir Jón. Bergur hélt á ný til veiða að löndun lokinni.

Gullver NS landaði síðan fullfermi á Seyðisfirði í morgun. Hjálmar Ólafur Bjarnason skipstjóri segir að í túrnum hafi verið gott kropp og smáskot þess á milli. „Við vorum á Gerpisflakinu meirihlutann af túrnum en enduðum síðan á Herðablaðinu. Aflinn var nánast eingöngu ýsa og þorskur,” segir Hjálmar.

Gullver heldur til veiða á ný á miðvikudagskvöld.

Vestmannaey VE landaði í Neskaupstað í morgun og var uppistaða aflans ýsa. Vestmannaey mun halda til veiða að löndun lokinni en ráðgert er að bæði Bergur og Vestmannaey landi á ný á fimmtudag.