Reglugerð um álagningu veiðigjalda á næsta fiskveiðiári hefur verið gefin út í samræmi við nýsamþykkt lög. Sérstakt veiðigjald á uppsjávarfisk hækkar miðað við yfirstandandi fiskveiðiár en gjaldið á botnfisk lækkar. Þá hafa sérstakir þorskígildisstuðlar verið gefnir út sem lagðir verða til grundvallar við útreikning veiðigjalda.

Fjárhæð veiðigjalda er:

  1. 9,50 kr. í almennt veiðigjald fyrir hvert sérstakt þorskígildiskíló. Almennt veiði­gjald á hvert skip skal þó aldrei vera lægra en 5.000 kr. (Óbreytt frá yfirstandandi fiskveiðiári).
  2. 38,25 kr. í sérstakt veiðigjald á hvert sérstakt þorskígildiskíló í uppsjávarveiðum (var 27,50 kr.) og 7,38 kr. á hvert sérstakt þorskígildiskíló í botnfiskveiðum (var 23,20 kr.) eins og þessar veiðar eru skilgreindar í 3. gr. laga nr. 74/2012 um veiðigjöld.

Lækkun sérstaks veiðigjalds (óbreytt):

  1. Af fyrstu 30.000 sérstöku þorskígildiskílóum hvers gjaldskylds aðila greiðist ekkert sérstakt veiðigjald.
  2. Af næstu 70.000 sérstöku þorskígildiskílóum hvers gjaldskylds aðila greiðist hálft sérstakt veiðigjald.
  3. Af sérstökum þorskígildiskílóum hvers gjaldskylds aðila umfram 100.000 greiðist fullt sérstakt veiðigjald.

Samhliða álagningu veiðigjalda hafa verið gefnir út sérstakir þorskígildisstuðlar við útreikninga á gjöldunum. Vægi einstakra fisktegunda gagnvart þorski er annað hvort aukið eða dregið úr því. Í flestum tilvikum munar litlu, en vægi grálúðu lækkar þó töluvert, fer úr 2,67 niður í 1,80 og vægi úthafskarfa fer úr 1,25 niður í 0,79.

Sjá reglugerð: http://stjornartidindi.is/Advert.aspx?ID=a78877e3-4d54-45f7-bb0e-d1439708afd1