Hafrannsóknastofnun greinir frá því að í árlegu haustralli hafi tegundin Þverhyrna veiðst í fyrsta sinn í íslenskri efnahagslögsögu.
„Þverhyrna tilheyrir hyrnuætt af ættbálki kjaftagelgna en flestir fiskar þessa ættbálks eru djúpfiskar, ýmist botnfiskar eða botn- og miðsævisfiskar. Þegar sjaldgæfar tegundir fást í leiðöngrum eru þær frystar og skoðaðar nánar við betri aðstæður á rannsóknastofu,“ segir í frétt á vef stofnunarinnar.
„Venjulega kostar þessi greiningarvinna þó nokkra yfirlegu en í þetta sinn þurfti Jónbjörn ekki annað en að berja fiskinn augum í nokkrar sekúndur til að þekkja tegundina.“
Jónbjörn Pálsson er ásamt Gunnari Jónssyni höfundur bókarinnar Íslenskir fiskar, þar sem gerð er grein fyrir öllum þeim 350 tegundum fiska sem fundist hafa í hafinu umhverfis Ísland sem og í vötnum landsins.
Hann er sagður hafa „oft verið innan handar við greiningar“ þegar torkennilegir fiskar veiðast í leiðöngrum Hafrannsóknastofnunar.
Togað á miklu dýpi
Fyrir nokkru lauk árlegu haustralli Hafrannsóknastofnunar en í þeim leiðangri er meðal annars togað á miklu dýpi eða allt að 1400 metrum. Þegar togað er svona djúpt finnast fjölmargar tegundir sem eru lítt þekktar þótt sumar séu nokkuð algengar.
„Einnig fást sjaldgæfar tegundir og sumar þeirra hafa fundist aðeins nokkrum sinnum á þeim 25 árum sem haustrallið hefur farið fram,“ segir í frásögn stofnunarinnar.
Komin í íslenska fiskafánu
„Í ár veiddist þverhyrna innan íslenskrar efnahagslögsögu og getur hún því hér með talist til íslenskrar fiskafánu.“
Þverhyrnan hefur þó áður veiðst utan efnahagslögsögunnar, til dæmis í leiðöngrum í Grænlandshafi fyrir allmörgum árum. Þaðan kannaðist Jónbjörn við hana.
