Félagsmenn Stangaveiðifélag Reykjavíkur er nú hvattir til þess af félaginu að skrifa undir undirskriftalista hjá NASF, Verndarsjóði villtra laxastofna . þar sem þess er krafist að „ráðamenn bindi enda á sjókvíaeldi á Íslandi“.
„Ef ekki er gripið í taumana núna munum við útrýma villta laxinum og ógna líffræðilegum fjölbreytileika á Íslandi. Stöndum saman og krefjumst þess að ráðamenn bindi enda á sjókvíaeldi á Íslandi,“ segir í yfirlýsingu NASF sem SVFR vitnar til.
„Öll þau umhverfisslys sem spáð var fyrir um í sjókvíaeldi eru nú orðin að veruleika. Frjóir norskir eldislaxar sem sleppa úr sjókvíum við Ísland synda upp í íslenskar ár og blandast villtum stofnum. Lúsafaraldur geysar á Vestfjörðum með tilheyrandi notkun á skordýraeitri. Villtum laxi fækkar og eldislaxi fjölgar. Eftirlit er í lamasessi og umhverfisleg ábyrgð iðnaðarins er engin. Lífsviðurværi 2.250 lögbýla í dreiðum byggðum er í hættu ef villtir laxastofnar skaðast. Ef ekki er gripið í taumana núna munum við útrýma villta laxinum og raska líffræðilegum fjölbreytileika á Íslandi. Stöndum saman og krefjumst þess að ráðamenn bindi enda á sjókvíaeldi á Íslandi,“ segir enn fremur í tilvitnaðri yfirlýsingu NASF.
