Smíði á nýju skipi Hraðfrystihússins-Gunnvarar hófst formlega á dögunum, en hinn 18. apríl kl. 10:38 hófst stálskurðurinn í skipasmíðastöðinni í Kína. Tímasetningin er engin tilviljun því að Kínverjar telja að tölunni 8 fylgi gæfa. Við þetta tækifæri voru einnig sprengdir margir Kínverjar eins og alsiða er þar í landi. Frá þessu er skýrt á heimasíðu Hraðfrystihússins Gunnvarar.
Skipið mun hljóta nafnið Páll Pálsson ÍS-102, en undirbúningurinn að smíðinni hefur tekið um ár, sem er nokkru lengri tími en áætlanir gerðu ráð fyrir.
Nú þegar hafa allir stærri hluti sem munu fara í skipið verið valdir, ss. vélar, framdrifsbúnaður og allur spilbúnaður.
© Aðsend mynd (AÐSEND)
Finnur Kristinsson hefur verið ráðinn eftirlitsmaður með smíði Páls Pálssonar og Breka VE, sem er smíðaður í sömu skipasmíðastöð. Finnur, sem var yfirvélstjóri á Arnari HU frá Skagaströnd til fjölda ára, verður staðsettur í skipasmíðastöðinni, en honum til aðstoðar hefur verið ráðinn kínverskur tæknifræðingur.
Þegar lengra líður á verkið er gert ráð fyrir að vélstjórar frá útgerðunum verði einnig við eftirlit auk þess sem aðrir starfsmenn fyrirtækjanna koma að verkinu.
Hér er listi yfir helsta búnað skipanna:
• Aðalvél: MAN Diesel & Turbo type 6L27/38 1790 Kw
• Gír: Reintjes gírhlutfall 9,2:1
• Skrúfubúnaður: MAN ,skrúfa 3 blöð, þvermál 4,7 m.
• Ásrafall: AEM 40 – 50 Hz 1500 KVA
• Ljósavélar: Caterpillar C18 400 Kw og C9 142 Kw
• Vindur: Naust Marine / Ibercisa, allar vindur rafdrifnar.
• Stýrisvél: Scan Steering
• Skilvindur: Alfa Laval
• Loftþjöppur: Sperre
• Léttabátur: Norsave
• Dekkkrani: Palfinger
• Löndunargálgi: Shanghai Goodway Marine Engineering Co.
• Dælur: Ascue
• Krapaísvél: North Star / Bitzer
• Aðaltafla: SAM electronics
• Siglingar og fiskileitartæki: Furuno, Simrad
• Útihurðir: Libra
Fylgjast má með smíði skipsins á Fésbókarsíðu nýsmíðarinnar, HÉR
