Eftir viðvarandi og mikinn taprekstur síðastliðin ár var fyrirtæki Skaginn 3X á Akranesi lýst gjaldþrota 4. júlí síðastliðinn og 128 starfsmenn misstu vinnuna. Helgi Jóhannesson, skiptastjóri þrotabúsins, segir marga hafa lýst áhuga á eignum búsins.
„Ég hef grun um að það séu einhverjir hópar að hnoða saman einhverju tilboði en ég er ekki búinn að fá nema eitt tilboð sem er í skoðun,“ segir Helgi. Þetta tilboð sé ekki í allar eignirnar en þó í stóran hluta af rekstrinum. „Það er ekki búið að svara því og ég get ekkert gefið upp um það meira.“
Aðspurður segir Helgi alla þá sem rætt hafi verið við um möguleg kaup á eignum þrotabúsins vera innlenda. Fram undan væri þó fundur með einum erlendum aðila. „En ég veit ekkert hvað kemur út úr því,“ ítrekar hann.
Viðskiptasambönd og einkaleyfi
![Alls 128 manns misstu vinnuna við gjaldþrot Skagans 3X.](http://vb.overcastcdn.com/images/135569.width-500.jpg)
Menn í sjávarútvegi hafa í kjölfar gjaldþrotsins lagt áherslu á það hlutverk sem starfsemi Skagans 3X hefur fyllt fyrir greinina.
„Ég heyri af mönnum í útgerðinni að það sé mikilvægt að halda þessari þjónustu og þekkingu í landinu. Ég heyri það líka að þetta séu spennandi línur sem fyrirtækið er með, annars vegar fiskvinnslulínur og hins vegar frystigræjur. En þar er sitt hvor hópurinn af fjárfestum sem hefur áhuga á sitt hvorum hlutanum. Síðan eru það viðskiptasamböndin og einkaleyfin fyrir þessari þekkingu sem eru mjög spennandi. Það er það sem er söluvaran,“ segir Helgi og leggur áherslu á að nú þurfi að hafa hraðar hendur.
„Það eru mikil verðmæti sem leynast þarna og þau eru fljót að fara forgörðum ef ekki tekst að koma þessu í drift sem fyrst,“ segir Helgi. Tímaramminn sé mældur í dögum.
Vill sjá tölur á blaði
„Ég vil fara að sjá einhver alvöru tilboð og loka einhverju á næstu viku eða tveimur, bara mjög fljótt. Ég er þó ekki að segja að eftir þann tíma verði eitthvað breytt um gír hjá mér en þá tek ég stöðuna aftur. En ég vil fara að sjá tölur á blaði frá þessu áhugasama fólki,“ segir Helgi sem kveðst nú stöðugt vera að gefa upplýsingar til áhugasamra.
„Ég er að tala við menn og upplýsa þá um hvernig þetta er en svo verða menn að setjast niður og setja tilboð á blað til þess að það sé hægt að taka afstöðu, það er ekki hægt að halda manni bara uppi á snakki.“
Um stöðu starfsmanna Skagans segir Helgi að því hafi ekki formlega verið sagt upp störfum heldur verið tilkynnt um það 4. júlí síðastliðinn að fyrirtækið væri orðið gjaldþrota.
Bréf til starfsfólks
![eskja](http://vb.overcastcdn.com/images/135570.width-500.jpg)
„Nú þarf ég að fara að skrifa starfsfólkinu bréf um það að þrotabúið ætli ekki að taka við ráðningarsamningum. Sem þýðir það – af því að þrotabúið ætlar ekki að vera í neinum rekstri – að gjaldþrotið er í raun ígildi uppsagnar. Það er þá eins og fólk hafi fengið uppsagnarbréf þá og þar með á það rétt til launa út júlí og síðan í þrjá mánuði í uppsagnarfresti. Það er náttúrlega ekkert til til að borga það þannig að fólkið verður að treysta á Ábyrgðasjóð launa með sín mál, að minnsta kosti eins og staðan er núna,“ útskýrir Helgi stöðuna.
Launakröfur njóta forgangs við uppgjör þrotabúa. Miðað við þann áhuga sem Helgi segir vera á eignum þrotabús Skagans má gera ráð fyrir því að mikið fáist upp í kröfur starfsfólksins.
„Ég veit ekki hvað kemur upp úr hattinum þegar það er búið að gera upp þetta þrotabú, það getur verið að koma eitthvað upp í forgangskröfur en ég get ekki sagt til um það á þessu stigi – á meðan ekki er búið að selja neitt,“ segir Helgi.
Sala gæti létt skiptin
Spurður hvort uppgjör þrotabús Skagans gæti ef til vill tekið tiltölulega stuttan tíma gangi
sala eigna þess tiltölulega hratt fyrir sig segir Helgi það kunna að vera.
„Ef einhver myndi koma núna og slengja peningum á borðið og kaupa allt þá er bara úrvinnsluatriði að greiða úr þessum kröfum en ég er náttúrlega kannski ekki búinn að kafa alveg ofan í hvort það séu einhver ágreiningsmál sem þarf að skoða eins og riftunarmál en það myndi létta skiptin mjög mikið ef það er hægt að koma eignunum í verð,“ segir skiptastjórinn.
Eftir viðvarandi og mikinn taprekstur síðastliðin ár var fyrirtæki Skaginn 3X á Akranesi lýst gjaldþrota 4. júlí síðastliðinn og 128 starfsmenn misstu vinnuna. Helgi Jóhannesson, skiptastjóri þrotabúsins, segir marga hafa lýst áhuga á eignum búsins.
„Ég hef grun um að það séu einhverjir hópar að hnoða saman einhverju tilboði en ég er ekki búinn að fá nema eitt tilboð sem er í skoðun,“ segir Helgi. Þetta tilboð sé ekki í allar eignirnar en þó í stóran hluta af rekstrinum. „Það er ekki búið að svara því og ég get ekkert gefið upp um það meira.“
Aðspurður segir Helgi alla þá sem rætt hafi verið við um möguleg kaup á eignum þrotabúsins vera innlenda. Fram undan væri þó fundur með einum erlendum aðila. „En ég veit ekkert hvað kemur út úr því,“ ítrekar hann.
Viðskiptasambönd og einkaleyfi
![Alls 128 manns misstu vinnuna við gjaldþrot Skagans 3X.](http://vb.overcastcdn.com/images/135569.width-500.jpg)
Menn í sjávarútvegi hafa í kjölfar gjaldþrotsins lagt áherslu á það hlutverk sem starfsemi Skagans 3X hefur fyllt fyrir greinina.
„Ég heyri af mönnum í útgerðinni að það sé mikilvægt að halda þessari þjónustu og þekkingu í landinu. Ég heyri það líka að þetta séu spennandi línur sem fyrirtækið er með, annars vegar fiskvinnslulínur og hins vegar frystigræjur. En þar er sitt hvor hópurinn af fjárfestum sem hefur áhuga á sitt hvorum hlutanum. Síðan eru það viðskiptasamböndin og einkaleyfin fyrir þessari þekkingu sem eru mjög spennandi. Það er það sem er söluvaran,“ segir Helgi og leggur áherslu á að nú þurfi að hafa hraðar hendur.
„Það eru mikil verðmæti sem leynast þarna og þau eru fljót að fara forgörðum ef ekki tekst að koma þessu í drift sem fyrst,“ segir Helgi. Tímaramminn sé mældur í dögum.
Vill sjá tölur á blaði
„Ég vil fara að sjá einhver alvöru tilboð og loka einhverju á næstu viku eða tveimur, bara mjög fljótt. Ég er þó ekki að segja að eftir þann tíma verði eitthvað breytt um gír hjá mér en þá tek ég stöðuna aftur. En ég vil fara að sjá tölur á blaði frá þessu áhugasama fólki,“ segir Helgi sem kveðst nú stöðugt vera að gefa upplýsingar til áhugasamra.
„Ég er að tala við menn og upplýsa þá um hvernig þetta er en svo verða menn að setjast niður og setja tilboð á blað til þess að það sé hægt að taka afstöðu, það er ekki hægt að halda manni bara uppi á snakki.“
Um stöðu starfsmanna Skagans segir Helgi að því hafi ekki formlega verið sagt upp störfum heldur verið tilkynnt um það 4. júlí síðastliðinn að fyrirtækið væri orðið gjaldþrota.
Bréf til starfsfólks
![eskja](http://vb.overcastcdn.com/images/135570.width-500.jpg)
„Nú þarf ég að fara að skrifa starfsfólkinu bréf um það að þrotabúið ætli ekki að taka við ráðningarsamningum. Sem þýðir það – af því að þrotabúið ætlar ekki að vera í neinum rekstri – að gjaldþrotið er í raun ígildi uppsagnar. Það er þá eins og fólk hafi fengið uppsagnarbréf þá og þar með á það rétt til launa út júlí og síðan í þrjá mánuði í uppsagnarfresti. Það er náttúrlega ekkert til til að borga það þannig að fólkið verður að treysta á Ábyrgðasjóð launa með sín mál, að minnsta kosti eins og staðan er núna,“ útskýrir Helgi stöðuna.
Launakröfur njóta forgangs við uppgjör þrotabúa. Miðað við þann áhuga sem Helgi segir vera á eignum þrotabús Skagans má gera ráð fyrir því að mikið fáist upp í kröfur starfsfólksins.
„Ég veit ekki hvað kemur upp úr hattinum þegar það er búið að gera upp þetta þrotabú, það getur verið að koma eitthvað upp í forgangskröfur en ég get ekki sagt til um það á þessu stigi – á meðan ekki er búið að selja neitt,“ segir Helgi.
Sala gæti létt skiptin
Spurður hvort uppgjör þrotabús Skagans gæti ef til vill tekið tiltölulega stuttan tíma gangi
sala eigna þess tiltölulega hratt fyrir sig segir Helgi það kunna að vera.
„Ef einhver myndi koma núna og slengja peningum á borðið og kaupa allt þá er bara úrvinnsluatriði að greiða úr þessum kröfum en ég er náttúrlega kannski ekki búinn að kafa alveg ofan í hvort það séu einhver ágreiningsmál sem þarf að skoða eins og riftunarmál en það myndi létta skiptin mjög mikið ef það er hægt að koma eignunum í verð,“ segir skiptastjórinn.