Sigurgeir Jónasson ljósmyndari í Skuld í Vestmannaeyjum telur að nú þegar svartfuglinn er sestur upp megi búast við að loðnan fari loks að sýna sig. Frá þessu segir ávef Vinnslustöðvarinnar.

„Miðað við fyrri reynslu gæti loðna verið að ganga núna til vesturs á milli Hornafjarðar og Vestmannaeyja, í Fjallasjónum eða við suðurströndina. Eigum við þá ekki að segja að eftir þrjá til sjö daga megi búast við loðnugöngu við Eyjar? Svartfuglinn var hálfum mánuði seinna á ferðinni í bjargið í ár en gjarnan gerist og þá álykta ég að loðnan sé líka sem því nemur seinni á ferðinni en áður,“ er vitnað í Sigurgeir á vsv.is.

Svartfuglinn í dagbókum Sigurgeirs

„Höfðinginn í Skuld, Sigurgeir Jónasson, hefur haldið dagbækur svo áratugum skiptir og skráir meðal annars hjá sér hvenær svartfugl sest upp í bergið í Ystakletti. Það gerist venjulega nálægt miðjum febrúar en í ár var kominn marsmánuður þegar syllur Ystakletts voru fullskipaðar,“ segir á vsv.is.

„Ég fór að taka eftir því að þremur til sjö dögum eftir að svartfugl settist upp í Ystakletti var komin veiðanleg loðna innan við Elliðaey. Í fyrra skráði ég í dagbókina að fyrsti svartfuglinn væri sestur upp 14. febrúar og 22. febrúar voru loðnubátar að veiðum norðan við Eyjar. Á föstudaginn var, 1. mars, sá ég fyrst svartfugl á tveimur syllum í Ystakletti en í dag, 3. mars, var allt bergið undirlagt. Fuglar á öllum syllum,“ er haft eftir Sigurgeiri sem kveðst auðvitað ekkert vita um hvort einhver loðna sé í sjónum yfirleitt.

Ætti að ganga fram hjá Eyjum eftir nokkra daga

„En ef við miðum við skráða reynslu frá fyrri árum ætti loðna að ganga fram hjá Vestmannaeyjum eftir fjóra til sjö daga. Fuglinn og loðnan eru þannig hálfum mánuði síðar á ferðum en áður. Ég er enginn vísindamaður en kann að lesa í náttúruna og tek til dæmis meira mark á eigin veðurspám en þeim sem Veðurstofan miðlar okkur. Ég lærði snemma að lesa skýin og annað í umhverfinu og það hefur reynst vel,“ segir Sigurgeir sem kveður svartfuglinn vera býsna nákvæman með tímann þegar hann sest upp í bergið.

Fávitalegar þjóðlendukröfur

„En það getur rokkað fram og til baka um fáeina daga, allt eftir veðri og ölduhæð. Fuglinn kýs frekar mildan sjó og hægviðr en rok og mikið brim þegar hann kemur sér fyrir,“ segir Sigurgeir í samtalinu á vef Vinnslustöðvarinnar.

Fleira er rætt við Sigurgeir, þar með talið ensku knattspyrnuna og kröfur fjármálaráðherra um að gera úteyjar Vestmannaeyja og hluta Heimaeyjar að þjóðlendu. „Þetta mál er einfaldlega fávitalegt af hálfu ríkisvaldsins,“ er meðal annars haft eftir Sigurgeiri um þær kröfur á vsv.is.