Kristján Þór Júlíusson, sjávarútvegs- og landbúnaðarráðherra, átti í gær fund með helstu hagsmunaaðilum í uppbyggingu fiskeldis. Tilefni fundarins var samþykkt Alþingis í síðustu viku á tveimur frumvörpum um fiskeldi, annars vegar um gjaldtöku og hins vegar um breytingar á ýmsum lögum um fiskeldi.

Þetta kemur fram í tilkynningu frá ráðuneytinu. Á fundinum fór Kristján Þór yfir næstu skref í þeim verkefnum sem samþykkt frumvarpanna leiða af sér og kallaði jafnframt eftir sjónarmiðum fundargesta.

Fundinn sátu fulltrúar frá Icelandic Wildlife Fund, Landssambandi veiðifélaga, Samtökum fyrirtækja í sjávarútvegi, Sambandi íslenskra sveitarfélaga auk fulltrúa frá sveitarfélögum á Vestfjörðum og Austurlandi.

„Undanfarna mánuði og misseri hefur umræðan um uppbyggingu fiskeldis verið nokkuð harkaleg og þar hafa þessir helstu aðilar skipt sér í fylkingar. Ég vildi með þessum fundi kalla fulltrúa þessara aðila saman og fara yfir næstu skref. Jafnframt hvetja þá til að leita leiða til að leggja sín lóð á vogarskálarnar þannig að meiri sátt geti skapast um uppbyggingu atvinnugreinarinnar. Ég er sannfærður um að samþykkt Alþingis á þessum tveimur frumvörpum geti orðið góður grunnur í því verkefni,“ er haft eftir Kristjáni Þór í tilkynningunni.

Stutt er síðan SFS birti álit sitt á nefndum frumvörpum um fiskeldið. SFS gerði margháttaðar athugasemdir við þau, sem ekki var tekið tillit til.

Þar segir:

„Æskilegt hefði verið að leggja meiri vinnu í grunnþætti og stefnumótun fyrir greinina til framtíðar. Því er það skoðun SFS að með setningu laganna hafi mikilsverðum þjóðhagslegum hagsmunum verið fórnað. Það er óskiljanlegt á öllum tímum, ekki síst nú þegar haft er í huga að fiskeldi er farið að skapa tugmilljarða tekjur. Það er ekki vanþörf á þegar við þjóðarbúinu blasir efnahagslegur samdráttur. Þegar þrengt er að rekstri fyrirtækja með þeim hætti sem boðað er í lögunum er hætt við að fyrirtæki muni halda að sér höndum í fjárfestingu. Það mun bitna á þjóðarhag og ekki síst íbúum sveitarfélaga þar sem fiskeldi hefur verið að ná sér á strik og haft mikil og jákvæð áhrif. Það er miður.

Þá segir þar að ekki sé „ljóst á þessari stundu hvaða áhrif nýju lögin muni hafa á fyrirhugaða uppbyggingu á fiskeldi er veruleikinn sem nú blasir við sá veruleiki sem greinin verður að vinna í. Íslensk fiskeldisfyrirtæki hafa sýnt þrautseigju, verið gætin og framsýn á undanförnum árum. Vonandi verður ekki lát á því.“