Grænlenska uppsjávarskipið Polar Ammassak kom til Neskaupstaðar um miðnætti með fyrsta loðnufarm ársins, um 2.000 tonn. Löndun úr skipinu hófst snemma í morgun en aflinn verður unninn í mjöl og lýsi.
Aflinn fékkst í sex holum um 80 mílur austnorðaustur af Langanesi. Í fyrstu fimm holunum fengust 100-350 tonn en í síðasta holinu fengust 600 tonn.
Polar Ammassak mun halda til loðnuveiða á ný strax að löndun lokinni.
Hafrannsóknaskipið Árni Friðriksson mun væntanlega halda til loðnuleitar á morgun og eru bundnar vonir við að loðnuleit á næstunni muni leiða til kvótaaukningar.
