,,Það hefur nánast ekkert fundist af loðnu og nú er komið leiðindaveður. Hér á svæðinu norðvestur úr Snæfellsnesinu eru sex loðnubátar. Tveir eða þrír þeirra köstuðu í morgun og fengu 20-30 tonn en síðan ekki söguna meir. Ég frétti af einum báti, Sigurði VE, sunnan við Reykjanesið í morgun. Hann fékk ekkert heldur og þar er komið leiðindaveður líka,“ sagði Björgvin Birgisson skipstjóri á Hákoni EA þegar Fiskifréttir ræddu við hann um þrjúleytið í dag.
Björgvin sagði að síðustu daga hefði 95% af veiddri loðnu verið hængur. Hrygnan væri lögst á botninn og búin að hrygna. Hákon EA frystir nú loðnukarlinn um borð fyrir markaði í Austur-Evrópu og líka fyrir sædýrasöfn á vegum Seaworld í Bandaríkjunum, auk þess að landa í bræðslu.
