Sala hjá Iceland Seafood International jókst um 6,5 prósent á þriðja ársfjórðungi og nam 102 milljónum evra sem er jafnvirði um 14,8 milljarða króna.
Þetta kemur fram á vef Viðskiptablaðsins þar sem einnig segir frá því að aðlöguð afkoma Iceland Seafood International fyrir skatta hafi verið jákvæð um 2,5 milljónir evra á fyrstu níu mánuðum ársins samanborið við 1,9 milljóna evra tap á sama tímabili í fyrra.
„Nettótap samstæðunnar á fyrstu níu mánuðum ársins nam 1,5 milljónum sem er töluverður viðsnúningur frá fyrra ári er félagið tapaði 20,7 milljónum evra. Sala félagsins á fyrstu níu mánuðum ársins nam 314 milljónum evra sem er um 1,3 prósent aukning milli ára,“ segir Viðskiptablaðið og vitnar síðan til orða Ægis Páls Friðbertssonar, forstjóra Iceland Seafood International, í uppgjörinu:
Aukin eftirspurn vegna banns á Rússa
„Fyrstu níu mánuðir ársins 2024 hafa staðfest að við erum á réttri leið. Helstu lykilmælikvarðar hafa farið í rétta átt. Þetta er jákvæð þróun við krefjandi markaðsaðstæður, svo sem hátt vaxtastig, verðbólgu, hátt hráefnisverð og lægri eftirspurn. Við sjáum batamerki á mörkuðum, sérstaklega í Evrópu, og aukna eftirspurn í Bandaríkjunum, meðal annars vegna banns á innflutningi á rússneskum fiski. Við væntum þess að þorskverð haldist hátt á næstu árum vegna kvótaskerðingar í Barentshafi. Laxaverð var hátt fyrri hluta ársins en hefur verið stöðugt síðan og gæti hækkað undir lok ársins,” segir Ægir Páll Friðbertsson.
Þá segir Viðskiptablaðið að heildareignir félagsins í lok tímabilsins hafi verið bókfærðar á 239,1 milljón evra sem sé lækkun um 15,7 milljónir evra frá fyrra ári. Eiginfjárhlutfall hafi verið 29,9 prósent. Samkvæmt afkomuspá félagsins verði aðlöguð afkoma þess fyrir skatta á árinu á bilinu 5 til 7 milljónir evra.
