Ríkisstjórnin hefur samþykkt tillögu sjávarútvegs- og landbúnaðarráðherra um að veiðum á gullkarfa í íslenskri fiskveiðilögsögu skuli framvegis stjórnað með aflareglu til fimm ára með endurskoðun á fimmta ári. Þessi ákvörðun er í samræmi við stefnu stjórnvalda um ábyrga fiskveiðistjórnun með sjálfbæra og hagkvæma nýtingu að leiðarljósi.
Aflareglan byggir á því að tryggja góðan karfaafla til lengri tíma litið með því að veiða árlega hóflegt hlutfall af stofninum byggt á stofnmati og ráðgjöf vísindamanna.
Þessi ákvörðun er lokaskrefið í löngu ferli. Ferlið byggir á hafrannsóknum og felst í prófun íslenskra vísindamanna á mismunandi aflareglum, vali á útfærslu í víðtæku samráði við hagsmunaaðila og loks mati Alþjóðahafrannsóknaráðsins á þeirri reglu sem valin er út frá kröfum um sjálfbærni og varúðarleið við stjórn fiskveiða.
Að fengnu jákvæðu mati Alþjóðahafrannsóknaráðsins lagði svo ráðherra tillöguna fyrir ríkisstjórn til samþykktar
Þetta kemur fram í fréttatilkynningu á vef atvinnuvegaráðuneytisins.
