Norska sjávarplássið Havöysund í Finnmörku í Norður-Noregi á við óvenjulegt vandamál að stríða. Í Noregi er ríkið með einkaleyfi á áfengissölu eins og á Íslandi en svo vill til að í Havöysund er engin vínbúð.
Forsvarsmenn sveitarfélagsins segja að mörg fiskiskip sniðgangi Havöysund af þessum sökum og sigli frekar með afla sinn til nágrannabæjanna Hammerfest eða Honningsvaag. Þess vegna verði Havöysund af talsverðum viðskiptum aðkomubáta bæði með afla og kost.
Í Havöysund eru þrjú stór fiskvinnslufyrirtæki og sveitarfélagið er hið tólfta stærsta í landinu hvað löndunarverðmæti varðar en það nam á fimmta milljarð íslenskra króna á árinu 2013. Í sveitarfélaginu búa um eitt þúsund manns. Forsvarsmenn þess hafa farið fram á að sitt „ríki“ og er beiðnin til athugunar hjá ríkinu.
Frá þessu er skýrt í Fiskeribladet/Fiskaren.
