Færeyska stjórnin hyggst afturkalla uppsögn Hoyvíkursamningsins, fríverslunarsamnings milli Íslands og Færeyja.
Jenis av Rana, utanríkisráðherra Færeyja, lagði fram þingsályktunartillögu þess efnis í gær. Í greinargerð með tillögunni kemur fram að íslensk og færeysk stjórnvöld hafi orðið ásátt um að samningnum verði breytt þannig að sjávarútvegur verði undanskilinn ákvæðum samningsins.
Það hefur í för með sér að Færeyingum verður heimilt að banna erlent eignarhald í sjávarútvegi, eins og kveðið er á um í lögum um fiskveiðistjórn Færeyja sem tóku gildi í ársbyrjun 2018. Sjá umfjöllun Fiskifrétta um þá lagabreytingu á sínum tíma.
Sú breyting verður þó gerð á þeim lögum að bann við erlendu eignarhaldi gildi einungis um nýjar fjárfestingar, ekki þær sem þegar eru veruleiki í færeyskum sjávarútvegi. Þetta hefur þýðingu fyrir Samherja hér á landi, þar sem Samherji er eigandi færeyska útgerðarfélagsins Framherja.
Frumvarp um breytingar á þessari löggjöf var lagt fram á færeyska Lögþinginu samhliða þingsályktunartillögunni, og er stefnt að því að þingið afgreiði hvort tveggja fyrir lok þessarar viku.
Færeyingar sögðu samningnum upp 31. desember 2018, en uppsagnarfresturinn er tólf mánuðir þannig að með því að afturkalla uppsögnina áður en sá frestur rennur út þá heldur samningurinn gildi.
Jafnframt kemur fram í greinargerð með ályktuninni að Íslendingar hafi fallist á að Færeyingar megi selja takmarkað magn af kjöti til Íslands tollfrjálst. Samkvæmt heimildum Fiskifrétta hafa Færeyingar um nokkra hríð reynt að fá Íslendinga til að flytja inn kjöt frá Færeyjum, en ákvæði EES-samningsins hafi flækst þar fyrir.
Utanríkisráðherrar landanna, þeir Guðlaugur Þór Þórðarson og Jenis av Rana, hittust í Kaupmannahöfn fyrr í mánuðinum til að ræða Hoyvíkursamninginn. Utanríkisáðuneytið sagði andrúmsloftið á þeim fundi hafa verið gott og Guðlaugur Þór hafi verið bjartsýnni að fundi loknum.
Færeyska stjórnin hyggst afturkalla uppsögn Hoyvíkursamningsins, fríverslunarsamnings milli Íslands og Færeyja.
Jenis av Rana, utanríkisráðherra Færeyja, lagði fram þingsályktunartillögu þess efnis í gær. Í greinargerð með tillögunni kemur fram að íslensk og færeysk stjórnvöld hafi orðið ásátt um að samningnum verði breytt þannig að sjávarútvegur verði undanskilinn ákvæðum samningsins.
Það hefur í för með sér að Færeyingum verður heimilt að banna erlent eignarhald í sjávarútvegi, eins og kveðið er á um í lögum um fiskveiðistjórn Færeyja sem tóku gildi í ársbyrjun 2018. Sjá umfjöllun Fiskifrétta um þá lagabreytingu á sínum tíma.
Sú breyting verður þó gerð á þeim lögum að bann við erlendu eignarhaldi gildi einungis um nýjar fjárfestingar, ekki þær sem þegar eru veruleiki í færeyskum sjávarútvegi. Þetta hefur þýðingu fyrir Samherja hér á landi, þar sem Samherji er eigandi færeyska útgerðarfélagsins Framherja.
Frumvarp um breytingar á þessari löggjöf var lagt fram á færeyska Lögþinginu samhliða þingsályktunartillögunni, og er stefnt að því að þingið afgreiði hvort tveggja fyrir lok þessarar viku.
Færeyingar sögðu samningnum upp 31. desember 2018, en uppsagnarfresturinn er tólf mánuðir þannig að með því að afturkalla uppsögnina áður en sá frestur rennur út þá heldur samningurinn gildi.
Jafnframt kemur fram í greinargerð með ályktuninni að Íslendingar hafi fallist á að Færeyingar megi selja takmarkað magn af kjöti til Íslands tollfrjálst. Samkvæmt heimildum Fiskifrétta hafa Færeyingar um nokkra hríð reynt að fá Íslendinga til að flytja inn kjöt frá Færeyjum, en ákvæði EES-samningsins hafi flækst þar fyrir.
Utanríkisráðherrar landanna, þeir Guðlaugur Þór Þórðarson og Jenis av Rana, hittust í Kaupmannahöfn fyrr í mánuðinum til að ræða Hoyvíkursamninginn. Utanríkisáðuneytið sagði andrúmsloftið á þeim fundi hafa verið gott og Guðlaugur Þór hafi verið bjartsýnni að fundi loknum.
