Afli Huldu Björnsdóttur GK til vinnslu hjá Vísi

Ísfisktogarinn Hulda Björnsdóttir GK frá Grindavík landaði í Hafnarfirði í gær. Allur þorskur og ýsa úr afla skipsins fór til vinnslu hjá Vísi í Grindavík en þar var um að ræða um 60 tonn. Annar afli var seldur á markaði. Hulda Björnsdóttir kom til landsins frá Vigo á Spáni þar sem hún var smíðuð um miðjan október í fyrra.

Stórfiskurinn, sem Vísir tók til vinnslu, fór til saltfiskverkunar en smærri fiskur var flakaður og frystur. Fiskurinn þótti góður í alla staði og gengur vel að vinna hann. Pétur Hafsteinn Pálsson, framkvæmdastjóri Vísis er mjög ánægður með samvinnu Vísis og útgerðar Huldu Björnsdóttur.

„Samvinna eins og þessi er til fyrirmyndar og mikilvæg fyrir Grindavík. Óveðrið að undanförnu hefur haft áhrif á veiðar og það var þörf á því að fá afla til vinnslu frá öðrum en okkar eigin skipum. Aflinn sem kom frá Huldu Björnsdóttur í gær kom sér vel og mikilvægt er að Grindvíkingar vinni saman í framtíðinni,” sagði Pétur.