Stíganda VE-77 verður lagt 10. nóvember 2014 vegna hagræðingar í útgerðarrekstri Vinnslustöðvarinnar. Áhöfninni, 12 manns, var af því tilefni sagt upp störfum í dag.
Frá þessu er greint á vef Vinnslustöðvarinnar, www.vsv.is .
Þessi ákvörðun var birt áhöfn Stíganda og tekið fram um leið að sjómennirnir njóti forgangs þegar ráðið verður í önnur störf sem kunna að losna hjá félaginu.
Þá var þess og getið að Stígandi kunni að verða gerður út að nýju til humarveiða í apríl 2015. Ekkert hefur verið ákveðið í þeim efnum en möguleikinn er fyrir hendi eins og staðan er nú.
