Góðri makrílvertíð og veiðum á síld úr norska-íslenska síldarstofninum er nú lokið hjá skipum HB Granda, Venusi NS og Víkingi AK, og næst á dagskrá eru veiðar á íslenskri sumargotssíld og kolmunna. Að sögn Garðars Svavarssonar, framkvæmdastjóra uppsjávarsviðs HB Granda, gengu veiðar í sumar eins og best verður á kosið.
,,Samkvæmt fyrirliggjandi aflaupplýsingum veiddust 21.700 tonn af makríl og 7.300 tonn af norsk-íslenskri síld á tímabilinu frá 2. júlí fram til loka septembermánaðar,“ segir Garðar en allur aflinn hefur farið til vinnslu hjá uppsjávarfrystihúsi félagsins á Vopnafirði. Þar var nánast óslitin vaktavinna allan sólarhringinn á meðan vertíðinni stóð.
,,Skipin fara nú og reyna fyrir sér í veiðum á íslensku síldinni en eftirstöðvar kvótans eru 6.200 tonn. Verði bið á því að síldin gefi sig til verður fyrst reynt við kolmunna,“ segir Garðar Svavarsson á vef HB Granda.
Því er við þetta að bæta að skipin eru nú bæði að kolmunnaveiðum undan SA landi.
