Eyjólfur Ármannsson innviðaráðherra hefur nú undirritað reglugerð um um aflaheimildir undir sértækum byggðakvóta í kjölfar þess að verkefnið færðist fyrr á árinu frá atvinnuvegaráðuneytinu yfir í innviðaráðuneytiðþ
Þetta kemur fram í eftirfarandi fréttatilkynningu frá innviðaráðuneytinu:
„Eyjólfur Ármannsson innviðaráðherra hefur nú undirritað reglugerð um um aflaheimildir samkvæmt 10. gr. a laga nr. 116/2006, um stjórn fiskveiða á fiskveiðiárinu 2025/2026, aflamark Byggðastofnunar.
Ákvörðun um ráðstöfun annarra hluta byggðakerfisins og eftir atvikum breytingar á fyrirkomulagi um ráðstöfun heimildanna verður tekin að undangenginni ítarlegri greiningu. Í stjórnsýsluúttekt Ríkisendurskoðunar frá 2024 voru settar fram ýmsar ábendingar um nauðsynlegar úrbætur og bent á að úthlutunarkerfi almenns byggðakvóta sé áratugagamalt og hafi ekki þróast í takti við samfélagslegar breytingar. Þá er í ráðuneytinu hafin vinna við smíði frumvarps til laga um strandveiðar og ráðstöfun byggðatengdra aflaheimilda og er stefnt að framlagningu þess í upphafi vorþings.
Með breytingu á forsetaúrskurði þann 17. júlí sl. fluttist ábyrgð á stjórnarmálefninu byggðakerfi í sjávarútvegi, svokallað 5,3% kerfi, úr atvinnuvegaráðuneyti og yfir í innviðaráðuneyti. Undir byggðakerfið fellur almennur byggðakvóti, sértækur byggðakvóti Byggðastofnunar, strandveiðar, línuívilnun, skel- og rækjubætur, frístundaveiðar og nýliðun vegna grásleppu. Því kemur það í hlut innviðaráðherra að ráðstafa magni aflaheimilda til framangreindra verkefna,“ segir í tilkynningu innviðaráðuneytisins.
