Fljótt skipast veður á lofti í makrílveiðunum. Einn daginn blossar veiðin upp og þann næsta eða síðar sama dag er ördeyða. Þannig aðstæður hafa núna verið í íslensku lögsögunni þar sem spurðist út að talsverð veiði væri við miðlínuna við Færeyjar. Í gær gerði brælu og veiði datt niður. Sömu sögu er að segja í Síldarsmugunni, þar veiðist lítið núna.
Fínasta makrílveiði var innan íslensku lögsögunnar í krikanum þar sem lögsögur Íslands og Færeyja mætast í byrjun vikunnar. Jón Axelsson skipstjóri á Sigurði VE sagði að talsvert mikið hefði verið af fiski og hann hefði verið á leið inn í þá íslensku. Verið var að landa um 1.560 tonnum úr Sigurði VE í Vestmannaeyjum í gær þegar rætt var við hann.
Beint úr slipp í makríl
Sigurður VE hafði verið fjarri góðu gamni á þessari makrílvertíð því hann er nýkominn úr slipp á Akureyri þar sem talsverðar tafir urðu á verklokum. Uppsjávarflotinn íslenski er nú að stórum hluta í íslensku lögsögunni að leita að makríl. Sjómenn hafa verk að vinna því íslenski kvótinn á þessu ári er rúm 120 þúsund tonn og þegar þetta er skrifað hafa veiðst rúm 56 þúsund tonn það sem af er vertíðar. Miklu getur munað ef veiðin færist alfarið inn í íslensku lögsöguna og afköstin verða meiri eftir því sem styttra er á miðin meðan veiðin helst góð.
Mikið af makríl innan lögsögunnar
Jón Axelsson og áhöfn héldu rakleiðis frá Akureyri í Síldarsmuguna en svo lá leiðin suður á bóginn inn í íslensku lögsöguna. „Við þurftum aðeins að hafa fyrir því að finna fiskinn en svo rættist bara vel úr þessu. Það var mikið að sjá þarna þegar við vorum á miðunum. Við byrjuðum túrinn í Síldarsmugunni en enduðum hann í okkar lögsögu. Þar var fiskur á stóru svæði við miðlínu Íslands og Færeyja. Það hafði verið fiskur líka sunnar en þessi fiskur var að koma inn úr færeysku lögsögunni,“ segir Jón.
Sigurður VE er í veiðisamstarfi með öðrum uppsjávarskipum Ísfélagsins, þ.e. Heimaey VE, Álsey VE og Suðurey VE. Jón sagði að mikið hefði verið af makríl inni í íslensku lögsögunni og þetta hefði verið stór og fallegur fiskur, af svipaðri stærð og jafnvel stærri en var að veiðast í júlí í íslensku lögsögunni. Hann segir þetta verðmætasta fiskinn og það sem menn séu að sækjast eftir.
„Þetta lítur mjög vel út. Ég held að allur flotinn sé þarna núna nema þeir sem eru að landa. Við þurfum að hafa hraðar hendur að ná kvótanum og við höfum til þess þennan mánuð og eitthvað fram í september. Við reiknum með að það verði búið að landa í dag eða í kvöld. Og þá verður bara haldið á miðin á ný,“ segir Jón sem er nú skipstjóri á Sigurði VE á móti Jóhannesi Danner sem í mörg ár hefur verið skipstjóri á Jónu Eðvalds SF.
Veiði dottin niður í Síldarsmugunni
Einnig höfðu verið spurnir um ágæta veiði í Síldarsmugunni sem nú er dottin niður. Sigurður Jóhannesson, skipstjóri á Beiti NK, var á leið í Smuguna eftir að landað hafði verið um 850 tonnum í Noregi. Önnur íslensk uppsjávarskip voru ekki á þeim slóðum, öll voru þau komin að miðlínunni við Færeyjar. Sigurðir sagði að töluverður fjöldi rússneskra skipa væri í Síldarsmugunni og þeir væru að taka 80 tonn að hámarki í holi og þaðan af minna. „Vonandi finnum við eitthvað meira, nóg er eftir af kvóta. Veðrið er aðeins farið að stríða okkur núna og þetta verður gloppótt næstu daga,“ segir Sigurður.
