Brim er með mesta kvótann af útgerðum landsins og Sólberg ÓF sem er í eigu Ísafélagsins með mesta kvótann af skipum samkvæmt úthlutun aflaheimilda fyrir fiskveiðiárið 2025/2026.
Þetta kemur fram í tilkynningu frá Fiskistofu þar sem segir að alls hafi 456 skip í eigu 377 aðila fengið úthlutað aflaheimildum.
Heildarúthlutun er rúm 287 þúsund þorskígildistonn. Þar af er úthlutun í þorski rúm 160 þúsund þorskígildistonn miðað við 168 þúsund þorskígildistonn á síðasta fiskveiðiári. Úthlutun í ýsu er tæp 44 þúsund þorskígildistonn og hækkar um 5 þúsund þorskígildistonn milli ára.
Fyrirtæki með hæstu úthlutunina:
- Brim hf. 9,16%
- Samherji Ísland hf. 8,58%
- Ísfélag hf. 6,61%
- Fisk Seafood ehf. 6,36%
- Vísir ehf. 4,18%
Skip með hæstu úthlutunina:
- Sólberg ÓF 1 (2917), Ísfélag hf. með 10.430 þorskígildistonn
- Guðmundur í Nesi RE 13 (2626), Útgerðarfélag Reykjavíkur hf. með 9.109 þorskígildistonn
- Drangey SK 2 (2893), FISK-Seafood ehf. með 6.442 þorskígildistonn.
Nánari upplýsingar um úthlutunina er að finna í reglugerð, á gagnasíðum Fiskistofu og í samantekt fiskveiðiáramóta.
