Trygve T. Poppe, prófessor emirítus við Norska dýralækningaskólann, gerir athugasemdir við fullyrðingar Gunnars Davíðssonar sjávarútvegsfræðings í jólablaði Fiskifrétta.
Gunnar, sem er deildarstjóri í auðlindadeild Tromsfylkis, sagði meðal annars að sjókvíaeldi væri vistvænasta fiskeldisaðferðin og að ósannað væri að strokulaxar úr sjókvíaeldi hefðu haft varanleg áhrif á villta laxastofna.
„Áhrif eldislaxa á umhverfið eru ekki eingöngu bundin við strokulaxa frá fiskeldisstöðvum. Þau fyrirtaks gögn sem felast í ljósmyndum sem borist hafa frá íslenskum eldisstöðvum sýna svo hafið er yfir allan vafa að nýleg vandamál með laxalús eru í senn öfgafull og umfangsmikil,“ segir Trygve í yfirlýsingu til Fiskifrétta.
Ósýnilegar örverur í eldislaxi
„Það er barnalegt að trúa því að mikið og samþjappað magn af dauðum fiski hafi engin áhrif á villta laxastofna á svæðinu. Sú staðreynd að illa sýktur fiskur heftur sloppið úr kvíunum auka á áhyggjurnar yfir stöðunni. Við ættum ætíð að hafa í huga að eldisfiskar bera með sér ýmsar ósýnilegar örverur; bakteríur og vírusa, sem gætu hafa mikil og neikvæð áhrif á villta laxastofna,“ segir áfram í yfirlýsingu Trygve.
Þá segir prófessorinn að með þetta í huga sé augljóst að viðhafa ætti strangar varúðarráðstafanir á öllum sviðum fiskeldis. Fyrir iðnað sem segist vera sjálfbær sýni þessi nýlegu stórslys í heilbrigðismálunum að svo ekki verði um villst að svo sé ekki.
Segir sögu um okkur sjálf
„Annað og jafn mikilvægt mál er heilbrigði og velferð eldisfiskanna sem eru ræktaðar skepnur. Það hvernig við förum með dýrin okkar segir mikið um okkur sjálf, menningu okkar og siðferðisgildi.
Almenningur í Noregi, fjölmiðlar, fréttastofur og stjórnmálamenn hafa vaxandi áhyggjur af heilbrigði, slæmri dýravelferð og dánartíðni í laxeldisiðnaðinum. Jafnvel hópar fiskiræktenda hafa lýst áhyggjum af stöðunni og slæmu orðspori iðnaðarins. Þessar áhyggjur undirstrika alvarleika stöðunnar.
Skeytingarleysi og afneitun er ekki lausnin fyrir sjálfbæran og heilbrigðan iðnað,“ segir Trygve T. Poppe.
