Þrjú af stærstu sjávarútvegsfélögum landsins sem skráð eru í Kauphöll Íslands hafa tapað samtals tæplega 49 milljörðum króna í markaðsvirði frá áramótum. Viðskiptablaðið segir frá þessu.
Um er að ræða Brim, Ísfélagið og Síldarvinnsluna sem öll hafa séð hlutabréfaverð sitt lækka umtalsvert það sem af er ári.
Sé tekið mið af fjölda hluta og hlutabréfaverði í ársbyrjun og gengi félaganna nú hefur markaðsvirði Brims lækkað um rúmlega 14,5 milljarða eða um 10,3%.
Ísfélagið hefur lækkað enn meira hlutfallslega en hutabréfaverð félagsins hefur farið úr 150,2 krónum í 132 krónur á hlut frá áramótum og markaðsvirði þess lækkað um nærri 14,9 milljarða sem jafngildir 12,1% lækkun.
Síldarvinnslan hefur lækkað um 11,5% frá áramótum og tapað um 19,6 milljörðum að markaðsvirði.
Sameiginleg lækkun er því um 49 milljarðar króna en loðnubrestur, yfirvofandi tvöföldun veiðigjalds ásamt öðrum ytri þáttum hafa skapað aukna óvissu í kringum greinina upp á síðkastið.
