Sýni, sem hefur verið leiðandi meðal einkarekinna prófunarstofa og nýtur mikils trausts, hefur gengið í stefnumótandi samstarf við Pharmaq Analytiq, sérhæft fyrirtæki á sviði greininga fyrir fiskeldi.
Sameiginlega munu þau hefja nýja og háþróaða greiningarþjónustu fyrir íslenskan markað.
Í fréttatilkynningu frá Sýni segir: „Þetta samstarf sameinar það besta úr báðum heimum: Sterka stöðu Sýni innanlands með sérfræðiþekkingu í matvælaöryggi, rekstur vottaðra prófunarstofa og náið samband við viðskiptavini á Íslandi, ásamt djúpstæðri sérþekkingu Pharmaq Analytiq á heilsufari fiska, greiningum og sérsniðinni greiningarþjónustu."
„Með þessu samstarfi munum við bjóða upp á nútímalega, nákvæma og hraða greiningarþjónustu, með staðbundinni tengingu. Það er lykilatriði fyrir okkur að vera nálægt viðskiptavinum okkar til að veita viðeigandi og öfluga gæðatryggða þjónustu,“ segir Hanna Lóa Skúladóttir, framkvæmdastjóri Sýni.
Starfsemi hefjist á fyrsta ársfjórðungi 2026
Nils Arne Grønlie, framkvæmdastjóri Pharmaq Analytiq, bætir við: „Pharmaq Analytiq er þekkt fyrir viðskiptavinamiðaða nálgun, nýsköpun og sérhæfingu í fiskheilsu. Í samstarfi við Sýni erum við spennt að geta lagt okkar af mörkum til áherslu fiskeldisiðnaðarins á bætt heilbrigði og velferð fiska, tryggt matvælaöryggi og sjálfbæra framleiðslu á svæðinu.“
Nýja greiningarþjónustan mun styrkja getu iðnaðarins til að greina heilbrigðisáskoranir snemma, bæta öryggi og styðja við hraðari ákvarðanatöku. Samstarfið byggist á trausti, gæðum og sameiginlegri framtíðarsýn um að styðja fiskeldisiðnaðinn með áreiðanlegum og framsýnum lausnum.
Áætlað er að starfsemi stofunnar hefjist á fyrsta ársfjórðungi 2026.
