Ný ríkisstjórn Samfylkingar, Viðreisnar og Flokks fólksins kynnti stefnuyfirlýsingu sína í Hafnarborg í Hafnarfirði í dag. Þar segir að það verði fyrsta verk ríkisstjórnarinnar að ná stöðugleika í efnahagslæifi og lækkun skatta. Einnig voru kynnt nokkur áform sem lúta að sjávarútvegi og fiskeldi.
Í stefnuyfirlýsingunni segir að mótuð verði auðlindastefna um sjálfbæra nýtingu og réttlát auðlindagjöld sem renni að hluta til nærsamfélags. Ríkisstjórnin mun hafa forgöngu um að samþykkt verði ákvæði í stjórnarskrá um auðlindir í þjóðareign.
Í sjávarútvegi verða gerðar auknar kröfur um gagnsæi í eignarhaldi og skerpt á skilgreiningu tengdra aðila. Ríkisstjórnin mun tryggja 48 daga til strandveiða.
Ríkisstjórnin mun styrkja lagaumgjörð fiskeldis til að sporna gegn neikvæðum áhrifum á lífríki og innleiða hvata til eldis á ófrjóum laxi og til eldis í lokuðum kvíum.
„Það er mjög skýrt í þessum sáttmála að það er algjör samstaða um að fara í sanngjörn og réttlát auðlindagjöld. Við höfum talað fyrir hækkun veiðigjalda og það verður skoðuð breytt útfærsla á veiðigjöldum sem verður auðvitað unnið skipulega og teknar umræður um hana. En þetta er verkefni sem er mikil sátt um í ríkisstjórninni,“ sagði Kristrún Frostadóttir, formaður Samfylkingar og verðandi forsætisráðherra.
