„Strandveiðar eru fyrst og síðast búbót fyrir aðila sem fyrir eru í kerfinu eða þá sem hafa selt sig út úr öðrum kerfum fyrir verulegar fjárhæðir,“ segir á vefsíðu Samtaka fyrirtækja í sjávarútvegi sem látið hafa vinna greiningu undir yfirskriftinni „Staðreyndir um strandveiðar“.
Meðalaldur strandveiðisjómanna er 59 ár
Þar er rakið að strandveiðum hafi verið komið á árið 2009. „Þær hafa aukist verulega frá þeim tíma. Ljóst er að upphafleg markmið stjórnvalda með strandveiðum um nýliðun og aukna byggðafestu hafa ekki náðst. Strandveiðar eru fyrst og síðast búbót fyrir aðila sem fyrir eru í kerfinu eða þá sem hafa selt sig út úr öðrum kerfum fyrir verulegar fjárhæðir. Meðalaldur strandveiðisjómanna er 59 ár. Þessar staðreyndir renna sannanlega ekki stoðum undir sjónarmið um nýliðun,“ segir á sfs.is.
Helmingur strandveiðimanna búi á höfuðborgarsvæðinu
Þá segir að verulegar aflaheimildir hafi verið teknar í gegnum tíðina af fyrirtækjum sem skapi örugg og vel launuð heilsársstörf fyrir sjómenn og landverkafólk um allt land.
„Þar sem strandveiðar eru umfangsmestar, á Vestfjörðum og Vesturlandi, er um helmingur strandveiðisjómanna búsettur á höfuðborgarsvæðinu. Störf hafa þannig verið tekin frá landsbyggð og færð til höfuðborgarinnar, þvert á upphafleg markmið,“ segir í færslunni.
Styrkja kerfi sem fjármálaráðherra kalli efnahagslega sóun
Þetta og og meira til megi lesa úr greiningu sem Samtök fyrirtækja í sjávarútvegi hafi gert og byggist á opinberum gögnum.
„Brýnt þykir að benda á stöðu strandveiða nú þegar stjórnvöld hyggjast enn bæta í kerfið; kerfi sem núverandi fjármálaráðherra kallar efnahagslega sóun. Greiningin styður þá niðurstöðu,“ segja Samtök fyrirtækja í sjávarútvegi.
Greiningu SFS má lesa hér Staðreyndir um strandveiðar (PDF).
