Útgerð Stafness KE hefur fengið úthlutað túnfiskkvóta Íslendinga í ár. Fjórir sóttu um leyfið en tveir umsækjendur uppfylltu ekki sett skilyrði. Varpað var hlutkesti um það hvor hinna tveggja fengi leyfið og kom það í hlut útgerðar Stafnessins.
Oddur Sæmundsson útgerðarmaður og skipstjóri á Stafnesi KE segist hlakka til að reyna veiðarnar en kvótinn er 25 tonn.
„Við eigum svo til allan búnað til túnfiskveiðanna enda sá sami og ég notaði við lúðuveiðar í fyrr. Þær græjur koma upphaflega úr túnfiskveiðiskipi,“ segir Oddur í samtali við Fiskifréttir. Hann telur líklegt að túnfisk sé að finna sunnan við land enda hafi japanskt skip fengið mjög góðan afla þar í október á síðasta ári.
Túnfiskleyfi Íslendinga hefur ekki verið nýtt undanfarin ár.
Sjá nánar í nýjustu Fiskifréttum.
