Frystitogarinn Blængur NK kom til heimahafnar í Neskaupstað í gær með fullfermi að lokinni 26 daga veiðiferð. Þetta kemur fram á vef Síldarvinnslunnar.
Aflinn var, 760 tonn upp úr sjó eða 23 þúsund kassar. Uppistaða aflans var gullkarfi, djúpkarfi og ýsa en einnig var nokkuð af gulllaxi, að því er segir á svn.is þar sem rætt er við Bjarna Ólaf Hjálmarsson skipstjóra.
„Það var veitt frá Rósagarðinum, fyrir sunnan og vestan land og vestur á Hala. Segja má að aflinn hafi verið jafn og góður allan tímann,“ er haft eftir Bjarna Ólafi. „Það var nánast samfelld vinnsla og þá er mikilvægt að hafa hörkuáhöfn eins og við höfum svo sannarlega. Skipið er troðfullt og það getur ekki verið mikið betra. Almennt má segja að þessi veiðiferð hafi gengið afar vel og það eina sem unnt er að kvarta yfir er ufsaleysið og það er ekki í fyrsta sinn sem kvartað er yfir því.“
Einnig kemur fram að áætlað sér að Blængur haldi á ný til veiða á fimmtudagskvöld og komi síðan inn í lok ágúst.
