Þrátt fyrir samdrátt í aflakvótum þá verður ekki annað sagt en að áhafnir togara HB Granda hafi staðið fyrir sínu á árinu sem er að líða. Heildarafli togaranna, sem eru átta talsins, er samtals rúmlega 51.500 tonn að verðmæti rúmlega 11,3 milljarða króna og er þá miðað við FOB verðmæti. Til samanburðar má nefna að á árinu 2009 var heildarafli togaranna rúmlega 47.000 tonn og aflaverðmætið var þá rúmlega 9,3 milljarðar króna (FOB). HB Grandi gerir út fimm frystitogara og afli þeirra jókst úr tæplega 31.900 tonnum í tæplega 33.800 tonn á milli ára. Aflaverðmætið jókst á sama tíma úr um 7,5 milljörðum króna í tæplega 8,6 milljarða króna eða um 16%. Ef litið er á einstaka togara þá kemur í ljós að Þerney RE er aflahæsti frystitogarinn með samtals tæplega 7.600 tonn. Venus HF er hins vegar það skip í þessum flokki sem skilaði mestu aflaverðmæti eða tæplega 1,9 milljarði króna. Á síðasta ári var Þerney með mestan afla, 6.761 tonn en Örfirisey RE skilaði þá mestum verðmætum eða rúmlega 1,5 milljarði króna. Í flokki ísfisktogaranna þá er Ásbjörn RE fremstur meðal jafningja. Heildaraflinn var tæplega 6.400 tonn og aflaverðmætið 926 milljónir króna. Á árinu 2009 var Ottó N. Þorláksson RE hins vegar með mestan afla og hæsta aflaverðmætið.