Sjómenn í neyð geta ekki lengur stólað á hjálp

Sambandsstjórn Farmanna- og fiskimannasambands Íslands (FFSÍ)  telur með öllu óásættanlegt að fjársvelti  Landhelgisgæslu Íslands  hafi leitt til þeirrar skelfilegu staðreyndar að sjómenn sem fjær eru landi en 20 sjómílur geti ekki lengur stólað á hjálp í neyð.

Í ályktun sambandsstjórnarinnar segir ennfremur:

,,Nýlegt atvik um borð í Sturlaugi Böðvarssyni staðfestir svo ekki verður um villst að ekki er spurning hvort, heldur fremur hvenær, ótímabært dauðsfall sjómanns ber að höndum beinlínis af þessum sökum. Nú fer í hönd úthafskarfavertíð á Reykjaneshrygg, en þar hefur reynsla undanfarinna ára leitt í ljós að lífsnauðsynlegt er að liðsinni LHG sé tryggt þegar á þarf að halda.

Skipstjórnarmenn krefjast  þess að líf sjómanna  verði metið til jafns við líf annarra þjóðfélagsþegna. Til þess að svo megi verða, ber að efla  þyrluflota  og starfsemi LHG í stað niðurskurðar,” segir sambandssstjórn FFSÍ