Norska ríkisstjórnin hefur ákveðið að verja 85 milljónum króna (um 1,6 milljarðar ISK) í styrki til þorksiðnaðarins. Styrkjunum verður ráðstafað til markaðsstarfs, til að bæta gæði og í rannsóknir og þróun.
Um er að ræða tveggja ára átak, 30 milljónir koma sem aukafjárveiting í ár og 55 milljónir á fjárlögum næsta árs.
Þorskiðnaðurinn í Noregi á undir högg að sækja. Efnahagskreppan í Evrópu hefur leikið helstu markaði fyrir þorsk frá Noregi grátt og leitt til verðlækkunar. Útflutningsverðmæti hefur ekki aukist þrátt fyrir að útflutningur á þorski hafi aukist um 40% í tonnum talið.
Áætlun ríkisstjórnarinnar felur meðal annars í sér:
· 10 milljónir í fræðsluherferð til að bæta gæði á fiski.
· 21 milljón til að auka hlut línuveiða.
· 6 milljónir til að bæta fiskmóttöku.
· 30 milljónir í markaðsmál.
· 10 milljónir í rannsóknir á aflameðferð.
· 8 milljónir í nýsköpun.
