Einar K. Guðfinnsson, sjávar- og landbúnaðarráðherra, ræddi í gær við starfsbróður sinn á Grænlandi, Finn Karlsen, sem er hér í opinberri heimsókn, um ýmis sameiginleg hagsmunamál landanna, þar á meðal stýringu á grálúðuveiðum en minnkandi gráðlúðustofn hefur verið áhyggjuefni sjávarútvegsyfirvalda í báðum löndum.
Á fundi sínum í ráðuneytinu samþykktu ráðherrarnir að koma á fót sérstakri nefnd embættismanna beggja þjóða til að fjalla um málið og komast að samkomulagi þeirra á milli.
Einnig munu fulltrúar ráðuneytanna einnig um veiðar á karfa. Ráðherrarnir ræddu nauðsyn þess að auka rannsóknir á þorskstofnum landanna og voru sammála um að auka samvinnu þar að lútandi.
Heimsækir fyrirtæki og stofnanir
Finn Karlsen er sjávarútvegs-, veiðimála- og landbúnaðarráðherra Grænlands og hófst heimsókn hans á þriðjudag. Fór hann um Ísafjörð og Bolungarvík ásamt Einari K. Guðfinnssyni, skoðaði fyrirtæki í sjávarútvegi og fundaði með bæjarstjórunum.
Í gær skoðaði hann síðan fyrirtæki og stofnanir á höfuðborgarsvæðinu sem tengjast sjávarútvegi, en í dag heimsækir hann m.a. Bændasamtök Íslands og Landbúnaðarháskóla Íslands á Hvanneyri.
Opinberri heimsókn ráðherrans lýkur í kvöld.
