Eyjólfur Ármannsson innviðaráðherra hefur skipað starfshóp um strandsiglingar við Ísland.
Þetta kemur fram í tilkynningu frá innviðaráðuneytinu. Þar er hlutverk starfshópsins sagt verða að móta og leggja fram aðgerðaáætlun um leiðir til að efla strandflutninga á sjó. Það sé meðal annars til þess að minnka álag á þjóðvegi landsins og draga úr umhverfisáhrifum.
„Það er afar mikilvægt að efla strandflutninga að nýju. Nauðsynlegt er að flutningar á sjó umhverfis landið verði veigamikill hluti af vöruflutningum um landið til framtíðar. Öflugar strandsiglingar verða fyrir vikið mikilvægur þáttur í að vernda vegakerfið,“ segir Eyjólfur Ármannsson innviðaráðherra í tilkynningunni.
Álag á vegi aukist hratt
Þá kemur fram að langstærstur hluti vöruflutninga hér á landi fari fram með stórum bílum um þjóðvegi. Álag á vegi hafi aukist hratt undanfarin ár og þar með sé talin umferð þungra vöruflutningabíla með auknum kostnaði í viðhaldi vega.
Starfshópurinn á að vinna áfram með skýrslu sem Vegagerðin gerði fyrir innviðaráðuneytið um strandflutninga við Ísland og greina hvernig unnt sé að efla vöruflutninga með strandflutningum. Tillögur hópsins eru sagðar verða lagðar til grundvallar við frekari stefnumótun í málaflokknum, þar með talið í samgönguáætlun. Hópurinn á að skila aðgerðaáætlun fyrir 1. desember 2025.
Í starfshópnum eru Magnús Jóhannesson, sem er formaður, Sóley Ragnarsdóttir, Katrín Pálsdóttir, Linda Björk Gunnlaugsdóttir, tilnefnd af Samtökum atvinnulífsins, Benedikt S. Benediktsson, tilnefndur af Samtökum verslunar og þjónustu, Fannar Gíslason, tilnefndur af Vegagerðinni og Jón Gunnar Jónsson, tilnefndur af Samgöngustofu.
Skýrsla Vegagerðarinnar um strandflutninga við Ísland (afhent ráðuneytinu í desember 2024)
