„Sveitarstjórn Langanesbyggðar lýsir sig jákvæða gagnvart hugmyndum um uppbyggingu rafeldsneytisiðnaðar og landeldis í Finnafirði,“ segir í bókun sveitarstjórnarinnar vegna hugsanlegrar uppbyggingar í Finnafirði.
Bókunin var lögð fram er sveitarstjórnin samþykkti drög að stefnu um uppbyggingu í Finnafirði.
Vindmyllur og landeldi
„Sveitarstjórn Langanesbyggðar lýsir yfir eindregnum vilja til að vinna áfram að framgangi Finnafjarðarverkefnisins sem meðeigandi að Þróunarfélagi Finnafjarðarhafnar ehf. Þar með talið þróun iðnaðar-og þjónustusvæðis í baklandi hafnar og þróun starfsemi þar sem hafnaraðstaða þarf að vera fyrir hendi,“ segir í stefnu Langanesbyggðar sem kemur fram í fundargerð sveitarstjórnarinnar frá 20. júní.
Þá lýsir sveitarstjórnin sig jákvæða gagnvart hugmyndum um uppbyggingu rafeldsneytisiðnaðar og landeldis í Finnafirði. Sömuleiðis gagnvart hugmyndum varðandi tilraunaverkefni sem myndi samanstanda af einni eða tveimur vindmyllum með samanlagt uppsett afl undir 10 MW.
Rafeldsneytisverksmiðja í skynsamlegum fösum
„Slík uppbygging mun styrkja orkumál svæðisins. Gangi viðræður við landeigendur eftir mun sveitarstjórn Langanesbyggðar taka jákvætt í frekara samtal varðandi verkefnið,“ segir sveitarstjórn sem ennfremur kveðst jákvæð fyrir áframhaldandi vinnu við þróun vindorkukosta á svæðinu með það fyrir augum að framleiða hluta þeirrar raforku sem til þurfi til að tryggja uppbyggingu á rafeldsneytisverksmiðju í skynsamlegum fösum.
Vindorkulundur á Sóleyjarvöllum
„Miðað við áætlaða orkuþörf fyrstu tveggja fasa er trúlegt að gera þurfi ráð fyrir að tveir vindorkulundir rísi á svæðinu. Einn kostur sem mætti skoða nánar, varðandi staðsetningu, er Sóleyjarvellir (eyðijörð í eigu sveitarfélagsins). Aðrir kostir koma til athugunar, liggi áhugi landeigenda fyrir. Allir nefndir virkjunarkostir eru í 4. áfanga rammaáætlunar,“ segir sveitarstjórnin í bókun sem samþykkt var með sex atkvæðum gegn einu.
Tíu ár frá undirritun samstarfssamnings um stórskipahöfn
Átta ár eru frá því undirrituð var viljayfirlýsing milli íslenskra stjórnvalda, Langanesbyggðar, Vopnafjarðarhrepps, Bremenports GmbH & Co.KG og Verkfræðistofunnar Eflu um áframhaldandi samstarf um uppbyggingu stórskipahafnar í Finnafirði.
„Viljayfirlýsingin er framhald af samstarfssamningi sem sveitarfélögin, Bremenports GmbH & Co.KG og EFLA undirrituðu í maí 2014. Viljayfirlýsingin tekur á þáttum sem koma þarf í farveg til þess að verkefnið geti þróast áfram,“ sagði í frétt á vef Alþingis þann 21. maí 2016.
Meðal annars var sagt frá hugmyndunum um stórskipahöfn í Finnafirði á vef Langanesbyggðar í september 2013. „ Þýska fyrirtækið Bremenport ætlar að stofna félag hér á landi sem mun rannsaka um eitt þúsund hektara lands við Finnafjörð og heilmikið hafsvæði til að meta kosti og galla þess að byggja alþjóðlega stórskipahöfn í Finnafirði,“ sagði í þeirri umfjöllun.
