Alltaf eru að finnast nýjar fisktegundir sem ekki var vitað um áður, ekki síst á djúpsævi. Sá fiskur sem meðfylgjandi mynd er af fannst í leiðangri vísindamanna í norðanverðum Mexíkóflóa nýlega. Hann er heldur ófrýnilegur á að líta eins og oft er raunin um fiska sem lifa á miklu dýpi.
Þrír fiskar af þessari tegund fundust á 1000-1500 metra dýpi. Þar nýtur sólarljóssins ekki við og fiskurinn sjálfur framleiðir ljós sem lýsir af stönginni sem gengur upp af hausnum á honum. Með því dregur hann að bráð sína.
Fiskar með eins konar veiðistöng ofan á hausnum kallast á ensku angler fish eða stangarveiðifiskar. Skötuselurinn okkar er með áþekkan útbúnað eins og margir vita, þótt ekki sé verkfærið eins tilkomumikið og á þessum fiski.
