Útgerðin Antares Fishing Company á Hjaltlandi hefur gert samning við norsku skipasmíðastöðina Simek í Flekkefjord um smíði á nýju uppsjávarskipi. Skipið leysir af hólmi eldra skip með nafninu Antares sem smíðað var í Flekkefjord árið 1996 og heitir nú Margret EA eftir að Samherji keypti það á fyrir skemmstu.
Það þykir nokkrum tíðindum sæta að norskar skipasmíðastöðvar skuli á ný geta keppt við erlendar stöðvar um smíði á skipi af þessu tagi, að því fram kemur á norska vefnum Kystmagasinet. Skipið verður 75,4 m á lengd og 15 m breitt með 12 sjókælitönkum, samtals 2.400 rúmmetrar. Aðalvélin er 6600 kW af gerðinni Wartsila. Klefar í skipinu eru fyrir 16 manns. Skipið er hannað af Skipsteknisk AS og útbúnaður er að verulegum hluta norskur.
Útgerðin fær nýja skipið afhent í desember 2016.
