Alþjóðlega ráðstefnan Arctic Algae fer fram í annað sinn í Reykjavík dagana 4. og 5. september næstkomandi en þema ráðstefnunnar í ár eru hagræn og umhverfisáhrif tengd smá- og stórþörungastarfsemi. Ræktun og fullvinnsla smáþörungaafurða er í mikilli sókn og hér á landi hefur byggst upp þörungavinnsla á heimsvísu. Engin matvælaframleiðsla úr hafinu hefur vaxið jafn hratt á síðustu áratugum og ræktun og fullvinnsla þörunga.
Ráðstefnan var haldin í fyrsta skipti á síðasta ári undir þema sjálfbærnimarkmiða Sameinuðu þjóðanna (FAO) með þátttöku FAO og Evrópusamtökum þörungafélaga (EABA). Í fyrra varð uppselt á ráðstefnuna en hana sóttu yfir tvö hundruð þátttakendur. Þetta árið er auk umhverfisáhrifa sérstaklega beint sjónum að hagrænum þáttum smá- og stórþörungastarfsemi.
Bjarkey Olsen Gunnarsdóttir matvælaráðherra og Áslaug Arna Sigurbjörnsdóttir, háskóla- iðnaðar- og nýsköpunarráðherra taka þátt í ráðstefnunni. Aðrir þátttakendur eru til að mynda fulltrúar stærstu félaga í Færeyjum, Noregi og Bandaríkjunum í stórþörungaræktun og fullframleiðslu ásamt framkvæmdastjóra Þörungavinnslunnar á Reykhólum. Þá verður framkvæmdastjóri stærstu umhverfissamtaka í heimi (WWF), Paul Dobbins, þátttakandi í málstofu sem og með erindi.
„Hugmyndin að alþjóðlegri þörungaráðstefnu hér á landi kemur frá grasrótinni þar sem okkur fannst að það þyrfti að koma Íslandi enn frekar á kortið í þessum ört stækkandi geira og að tækifærin allt í kringum okkur verði betur nýtt. Markmiðið Arctic Algae er að skapa aukna umræðu um þörungastarfsemi og tengja saman fólk úr geiranum til þess að kynnast og læra hvert af öðru. Sjálfbær öflun, ræktun og fullvinnsla þörunga hefur verið í gríðarmiklum vexti á heimsvísu að undanförnu og ekki síst umræða um mikilvægi þörunga þegar það kemur að sjálfbærni og umhverfismálum.
Við höfum kallað eftir frekari þátttöku frá ríkinu varðandi uppbyggingu innviða til að styðja við ræktun þörunga og vonumst við eftir að þau svari kallinu. Ísland hefur alla burði til að geta orðið leiðandi í þörungarækt á heimskautasvæðinu enda erum við með aðgang að grænni raforku, jarðvarma og hreinum sjó og vatni. En þá þarf meira samtal og samvinnu og vonum við að ráðstefnan stuðli að því,” segir Sigurður Pétursson, formaður Samtaka þörungafélaga.
Arctic Algae fer fram í höfuðstöðvum Arion banka við Borgartún og er stýrt af Rækt nýsköpunarmiðstöðvar lagareldis með Samtökum þörungafélaga og unnin í samstarfi við evrópsku þörungasamtökin EABA. Helstu styrktaraðilar ráðstefnunnar eru Algalíf, Þörungarvinnslan á Reykhólum og Arion banki.
