Hafrannsóknastofnun greinir frá því að frá árinu 2015, þegar skráningar á botndýrum hófust í haustralli Hafrannsóknastofnunar, hafi yfir 600
tegundir verið greindar og á milli 7475 og 10800 eintök hafa verið talin árlega. Sýni hafa verið tekin á um 100 stöðvum árlega.
„Þessi gagnasöfnun er stórt skref í átt að því að afla grunnþekkingar á botnlífríki á djúpslóð umhverfis landið og gefur ákveðnar vísbendingar um það hvar ólík vistkerfi er að finna,“ segir í nýrri skýrslu um þessar skráningar.
„Árið 2015 hófst skráning botndýrameðafla við stofnmælingu botnfiska á djúpslóð að haustlagi og var markmið að halda úti árlegri langtímavöktun á botndýrum umhverfis Ísland. Þannig væri í fyrsta sinn hægt að fylgjast með mögulegum breytingum á lífmassa, fjölbreytileika og á útbreiðslu botndýra við landið og hugsanlega komu nýrra tegunda á djúpslóð. Botndýr eru tínd úr aflanum og þau greind til tegunda, talin, vigtuð og skráð inn í gagnagrunn.“
Stofnunin segir grunnupplýsingar um útbreiðslu og þéttleika botndýra, einkum á djúpslóð, enn vera mjög rýrar. Því séu þessar upplýsingar mikilvægar fyrir ýmsar rannsóknir og við ráðgjöf vegna viðkvæmra tegunda og búsvæða.
Auk skráningar hafa verið teknar yfir 3000 ljósmyndir af stórum hluta þeirra tegunda sem komið hafa upp.
„Sambærileg skráning botndýra hefur verið í gangi í Barentshafi og fleiri þjóðir á norðurslóðum standa að slíkum skráningum að einhverju marki. Átak í skráningu botndýrameðafla á norðurslóðum hófst árið 2015 og hafa botndýrafræðingar farið á milli landa og tekið þátt í rannsóknaleiðöngrum til að samræma aðferðir og greiningar.“
Þá segir að AVS rannsóknasjóður í sjávarútvegi hafi allt frá árinu 2015 styrkt þátttöku erlendra botndýrafræðinga í rannsóknaleiðöngrum í haustralli Hafrannsóknastofnunar hér við land.
Skýrsluna má nálgast á vef Hafró.
