Árni Friðriksson HF, rannsóknaskip Hafrannsóknastofnunar, lagði úr höfn í Hafnarfirði 3. júní síðastliðinn og verkefnið framundan var að kortleggja bæði vestanverðan og austanverðan hluta Reykjaneshryggjarins, á 1.000 til 2.000 metra dýptarbili.
Davíð Þór Óðinsson jarðfræðingur hjá Hafró sem hefur umsjón með verkefninu segir að mörgu að hyggja við þetta verkefni. Hann er um borð í Árna Friðrikssyni.
„Báðir hlutar einkennast af hryggjum og neðansjávareldfjöllum sem myndast hafa vegna gliðnunar og eldvirkni á Reykjaneshryggnum fyrir um 6-20 milljónum árum. Austurhlutinn er þó þakinn þykkum setlögum, svonefndum „contourite drift“, sem myndast af stöðugum botnstraumum og leiða til þess að hafsbotninn austan til er mjög flatur. Kortlagningu í kringum Reykjaneshrygg lauk þann 21. júní.
Síðustu dagarnir voru krefjandi, með sunnanvindi allt að 20 metrum á sekúndu, en þrátt fyrir það tókst okkur að safna mjög góðum gögnum við erfiðar aðstæður. Þar sem nú er búið að kortleggja öll svæði dýpri en 500 metrar suður og vestur af Íslandi, var næsta skref að færa sig til Jökuldjúps, sem er vestan við Reykjanesskaga.
Svæðið sem nú er verið að kortleggja í Jökuldjúpi er um það bil 38 km breitt, 70 km langt og 350 metra djúpt. Uppruni djúpsins gæti tengst kulnuðum rekhrygg, en núverandi ásýnd er mótuð vegna jökla á síðasta ísaldarskeiði. Leiðangrinum líkur þann 24. júní. Hingað til í leiðangrinum höfum við kortlagt yfir 30.000 km²,“ segir Davíð Þór.
