Kanna möguleika á ljósátuveiðum

Hafrannsóknastofnun og Hraðfrystihúsið Gunnvör hf. vinna að rannsóknum á stofnstærð ljósátu í Ísafjarðardjúpi. Rannsóknirnar hafa verið styrktar af AVS-sjóðnum, að því er fram kemur á vef bb.is . Kristján G. Jóakimsson, vinnslu- og markaðsstjóri HG, segir að fyrirtækið hafi lagt til bátinn Val ÍS í rannsóknirnar. „Það er verið að reyna að nálgast stofnstærðarmat ljósátunnar með stofnstærðarmælingum og hvort að mögulegt sé að nýta þennan stofn,“ segir Kristján. Ljósátan yrði fyrst og fremst nýtt til manneldis.

„Í Asíu eru þekktar þurrkaðar afurðir úr ljósátu og það eru þær sem við erum að horfa til. Við erum með væntingar um að stofninn sé nógu stór til að það sé hægt að gera út einn bát hluta úr ári á ljósátu. En það vantar fleiri rannsóknir og við erum með aðra umsókn á hjá AVS-sjóðnum. Það er búið að fara í nokkra leiðangra sem ganga út á að sannreyna aðferðafræðina við að mæla stofninn,“ segir Kristján.

Hjalti Karlsson, útibússtjóri Hafrannsóknastofnunar á Ísafirði, tók þátt í rannsóknunum fyrir hönd Hafró ásamt öðrum starfsmönnum stofnunarinnar. Við rannsóknirnar var beitt ýmsum aðferðum við stofnmælingu. „Það voru notaðar bergmálsmælar á fjórum tíðnum, einnig háfar sem voru dregnir eftir botninum og fínriðið troll. Svo var líka notuð svokölluð svifsjá sem er stórmerkilegt verkfæri. Svifsjá er dregin eftir bátnum og sjór rennur í gegnum sjána sem tekur fimmtán myndir á sekúndu af því sem rennur í gegn. Hugbúnaður fer svo í gegnum myndirnar og greinir allar lífrænar agnir sem renna í gegn og þá fæst fjöldi og tegundir í tilteknu rúmmáli sjávar,“ segir Hjalti.

Niðurstöður rannsóknanna eru að áætlaður árlegur meðallífsmassi er 25 þúsund tonn af ljósátu á athugunarsvæðinu, sem er fyrst og fremst Állinn inn undir Kaldalón.