Ísfisktogarinn Bergur VE kom til Eyja í gær með fullfermi. Jón Valgeirsson skipstjóri segir frá veiðiferðinni á heimasíðu Síldarvinnslunnar.
„Í þessum túr var víða veitt. Túrinn tók fimm sólarhringa og þar af var verið að veiðum í fjóra en einn sólarhringur fór í stím. Við byrjuðum á að veiða ýsu á Papagrunni og síðan sneru menn sér að þorski á Langabanka á Breiðdalsgrunni. Loks var farið á Lónsbugtina og þar fékkst ufsi, koli og ýsa. Aflinn í túrnum var mest ýsa, töluvert af þorski og ufsa og síðan dálítið af kola og steinbít. Það var þokkalegt veður megnið af túrnum en þó bölvaður lurkur í eina tvo daga. Það er dálítið kaldur sjór víða og hvergi fantaveiði en sæmilegt nudd. Það verður að segjast að aflinn er alveg viðunandi. Nú förum við út síðdegis í dag og þá á að reyna við ufsa. Ekki veit ég hvernig það mun ganga en ufsinn hefur verið afar erfiður viðureignar lengi,” segir Jón.
