Íslenskt sjávarfang er að hefja fiskvinnslu á Þingeyri

Íslenskt sjávarfang í Kópavogi mun hefja fiskvinnslu á Þingeyri nú í vikunni, að því er fram kemur í nýjustu Fiskifréttum.

Íslenskt sjávarfang í Kópavogi byrjaði sem lítið fiskvinnslufyrirtæki sem sinnti eingöngu innanlandsmarkaði en fór síðan í útflutning. Nú er fyrirtækið með stærri framleiðendum á ferskum fiski.

Árið 2011 var fjöldi starfsmanna Íslensks sjávarfangs kominn í um 100 manns. Fyrirtækið hefur unnið úr 7 til 9 þúsund tonnum af hráefni síðastliðin ár. Velta þess hefur verið milli 3 og 4 milljarðar á ári.

Stjórn Byggðastofnunar gekk nýverið til samninga við Íslenskt sjávarfang um aflaheimildir stofnunarinnar á Þingeyri. Um er að ræða 400 þorskígildistonn sem úthlutað er í því skyni að styrkja atvinnu og byggð á Þingeyri. Íslenskt sjávarfang stefnir að því að vinna um 4 þúsund tonn af fiski á Þingeyri sem er umtalsvert magn. Áhersla verður lögð á frystingu en samhliða verða einnig unnar ferskar afurðir.

Sjá nánar umfjöllun í nýjustu Fiskifréttum.