Færeysk stjórnvöld undirbúa nú lög sem takmarkað eignarhald útlendinga í færeysku fiskeldi við 20%. Íslendingar eru undanþegnir þessu ákvæði því í gildi er fríverslunarsamningur milli Íslands og Færeyja sem kveður á um gagnkvæmar frjálsar fjárfestingar í löndunum tveimur.
Á þetta er bent í norska sjávarútvegsblaðinu Fiskeribladet/Fiskaren. Þar segir að mikillar óánægju gæti innan norska fiskeldisiðnaðarins og meðal fjárfesta vegna fyrirhugaðrar lagasetningar í Færeyjum. Tvö stór eldisfyrirtæki í Noregi eiga þar hagsmuna að gæta. Salmar á 25% í Bakkafrosti, langstærsta fiskeldisfyrirtæki Færeyja sem framleiðir 40.000 tonn af laxi á ári. Salmar fær að halda sínum hlut en má ekki kaupa meira.
Annað norskt fyrirtæki, Marine Harvest, á 70% í Marine Harvest Faroes og heldur líka sínum hlut en verður bannað að auka hann. Marine Harvest Faroes framleiðir 6.000-7.000 tonn af laxi á ári.
Á níunda áratugnum voru 60 fiskeldisstöðvar í Færeyjum en þeim hefur fækkað í fjórar. Þær tvær sem ekki hafa verið nefndar eru Luna sem framleiðir 10.000 tonn af laxi á ári og Faroe Farming með 3.000-4.000 tonn af laxi.
