Frystitogarinn Blængur NK kom til Neskaupstaðar í morgun með góðan afla. Aflinn er tæplega 500 tonn upp úr sjó að verðmæti 151 milljón króna.
Frá heimkomu skipsins segir á heimasíðu fyrirtækisins . Þar segir jafnframt að uppistaðan í aflanum er grálúða og ufsi.
Að sögn Bjarna Ólafs Hjálmarssonar skipstjóra var skipið allan tímann að veiðum á miðunum út af Austur- og Suðausturlandi. Veiðin var almennt góð og reyndar var mokufsaveiði í eina tíu daga. Veðrið var gott allan túrinn að undanskilinni einni smábrælu.
Gert er ráð fyrir að Blængur haldi til veiða á ný á sunnudagskvöld og verður þá farið í annan hefðbundinn túr þar sem áhersla verður lögð á karfa-, ufsa- og grálúðuveiðar, segir í frétt Síldarvinnslunnar.
